Rannsakar þotuhreyfla fyrir Rolls Royce

„Það má alveg segja að ég komi fólki á óvart, ég veit ekki til þess að það séu margar verkfræðistelpur í módelfitness eða módelfitness-stelpur í verkfræði,“ segir hin 24 ára gamla Katrín Edda Þorsteinsdóttir, módelfitness-keppandi og vélaverkfræðingur. Hún er nú að klára mastersnám við Karlsruhe Institute of Technolology í Þýskalandi, þar sem hún rannsakar þotuhreyfla fyrir breska bíla- og vélaframleiðandann Rolls Royce.

„Ég er að vinna að mastersverkefni sem fjallar um hönnun á kæliholum í brunahólfi í þotuhreyfli og er þar að reyna að skoða mismunandi hönnun til þess að hámarka nýtnina,“ útskýrir Katrín Edda, en Rolls Royce er einn stærsti þotuhreyflaframleiðandi heims. „Ég hef mikinn áhuga á þessu, þetta er mjög skemmtilegt.“

Fyrir utan mastersverkefnið sitt hefur Katrín í nógu að snúast og starfar hún hjá þýska tæknirisanum Bosch. „Ég var í starfsnámi hjá Bosch og átti bara að vera í fjóra mánuði. Mér bauðst svo að vera þar áfram og verð þar næstu sjö mánuðina,“ bætir Katrín Edda við. Hún er þó líklega best þekkt fyrir velgengni sína í módelfitness en hún varð meðal annars heildarsigurvegari í bikini-fitness á International Austrian Championship fyrir skömmu, þá lenti hún í öðru sæti í Íslandsmótinu sem fram fór um páskana og í öðru sæti á móti í Ungverjalandi í síðustu viku.

Af hverju módelfitness? „Þegar ég byrjaði í einkaþjálfun hjá Konráði Val í World Class var ég ekkert að spá í keppni en svo hvatti hann mig til þess að taka þátt í Íslandsmótinu 2011. Þar lenti ég í sjöunda sæti þrátt fyrir að hafa ekki lagt mig neitt fram af viti og haldið því fram að ég ætti alls ekki heima í þessu sporti. Þetta hvatti mig því áfram og þá varð ekki aftur snúið.“

Það þarf mikinn sjálfsaga til þess að geta áorkað öllu því sem Katrín tekur sér fyrir hendur. „Ég æfi flesta daga og í niðurskurði jafnvel tvisvar á dag. Mér finnst ég þurfa að fá frí frá verkfræðinni stundum og því er gott að gera eitthvað allt annað eins og að fá útrás á æfingum, mér finnst módelfitnessið ótrúlega skemmtilegt og að stíga á svið er eitt það skemmtilegasta sem ég geri,“ segir Katrín Edda.

Hún hefur þó ekki alltaf haft jafn gaman af því að keppa. „Mig skorti sjálfstraust í upphafi, ég hugsaði alltaf of mikið um keppendurna í kringum mig og var uppfull af neikvæðum hugsunum um sjálfa mig sem drógu mig niður.“ segir Katrín Edda um upphafið. „Í dag einblíni ég einungis á sjálfa mig og mín afrek og horfi aldrei á hina keppendurna sitt hvorum megin við mig og hef til dæmis iPodinn í eyrunum alveg fram að sekúndunni áður en ég stíg á svið.“ Hún er þó öruggari og nýtur þess að keppa í dag.

Katrín Edda býr ásamt kærastanum sínum, Tryggva Gunnarssyni, í Karlsruhe. „Kærastinn minn er mun ævintýragjarnari en ég og ég hefði aldrei farið út án hans en þetta er besta ákvörðun sem ég hef tekið og við höfum það mjög gott hérna úti.“