Minnka neikvæðar hugsanir og ná betri tökum á huganum

„Mín áramótaheit eru í raun að festa enn betur í sessi þá lífssýn sem ég hef staðið fyrir síðustu ár. Ég hef alltaf verið náttúrubarn og aðhyllst fegurð skynseminnar þegar kemur að heilsunni og lífsstílnum í heild sinni. Ég ætla mér að halda áfram að borða hreinan mat – sem minnst af aukefnum og viðbættu hinu og þessu,“ segir Arndís Thorarensen framkvæmdastjóri Lifandi markaðar spurð um áramótaheitin hennar og bættan lífsstíl árið 2014.

Tekur bætiefni

„Með árunum hef ég minnkað kjötneysluna út frá dýraverndunarsjónarmiðum og þar vel ég fremur gæði en magn. Alla virka daga fæ ég mér engiferskot með cayenne pipar með starfsfólkinu á Lifandi markaði – þetta er hamingjustundin okkar á hverjum degi. Ekkert er betra en góður kaffibolli og kaffi verður eitt af stórunum ástunum í lífi mínu á nýju ári. Það er bara þannig. Ég er dugleg að muna eftir bætiefnunum mínum og þar ber helst að nefna D-vítamín, Magnesíum og Græna góða duftið í Grænu þrumunni minni.“

Minnka neikvæða hugsun

„Svo er mér mikið umhugað um tímann, að nýta tímann sem ég hef betur. Fjölskyldan er númer eitt, búa til góðar stundir með mínum nánustu og njóta hvers augnabliks. Nútíminn er svo hraður og áreitið svo mikið og ég hef ákveðið á nýja árinu verði ég meira á staðnum þar sem ég er í stað þess að láta ytra umhverfi trufla mig. Eitt af því sem mér er einnig umhugað um þessa dagana er að minnka neikvæðar hugsanir og ná betri tökum á huganum. Velja og hafna , setja mörk og finna frelsið og hamingjuna í því.“



Einfalda æfingaplanið

„Á nýja árinu ætla ég mér að einfalda æfingaplanið. Líkamsræktin er hluti af náttúrulega lífsstílnum, við eigum bara einn líkama og hann ber að vernda og viðhalda. Besta líkamsræktin er oft nær okkur en við höldum, ég er mikið að ganga þessa dagana, langir og góðir göngutúrar viðhalda góðu hreysti og eru frábær heilun. Ég er búin að vera eins og Forrest Gump að ganga út um allan bæinn síðustu misseri og það er bara frábært. Síðan er það jógað auðvitað núna á nýja árinu, spurning um að byrja á því fyrir alvöru núna,“ segir Arndís.