United spilaði eins og handboltalið

Arjen Robben, leikmaður Bayern München, var ekki hrifinn af leikskipulagi Manchester United, í leik liðanna í gær.

Leiknum lauk með 1-1 jafntefli en þýsku meistararnir áttu á löngum köflum erfitt með stífan varnarleik United.

„Þetta var ekki auðvelt því andstæðingar okkar lokuðu á okkur. Við vildum spila fótbolta en þeir reyndu að stöðva okkur,“ sagði Robben í samtali við þýska fjölmiðla eftir leikinn í gær.

„Enska liðið beitti svo bara skyndisóknum og var afar varnarsinnað. Þetta var næstum því eins og í handbolta.“

„En maður verður að vera ánægður með jafntefli eftir að hafa lent marki undir. Það eru góð úrslit fyrir síðari leikinn og við verðum bara að klára leikinn þá.“