Vatnsberinn hótaði lögreglumönnum lífláti og sagðist ætla á mannaveiðar

Þór Ólíver Gunnlaugsson var í dag dæmdur í Hæstarétti Íslands í sex mánaða fangelsi fyrir að hafa hótað lögreglumönnum lífláti og fyrir að hafa haft fíkniefni í fórum sínum. Þór var dæmdur í sextán ára fangelsi árið 2000 fyrir manndráp.

Þór Ólíver er gert að sök að hafa sagst ætla að koma heim til tveggja lögreglumanna og skjóta þá þegar lögregla handtók hann í júlí í fyrra. Þá fundust í fórum hans 2,03 grömm af fíkniefninu MDMA og 1,61 gramm af amfetamíni.  Honum er gert að greiða samtals 642.495 krónur í áfrýjunarkostnað og málsvarnarlaun verjanda síns.  Þór Ólíver neitaði að hafa hótað lögreglumönnunum en játaði fíkniefnabrot sitt.

Sagðist ætla á mannaveiðar

Í dómi Héraðsdóms Reykjavíkur segir að lögregla hafi fengið tilkynningu um ölvaðan mann sem væri til vandræða á eldsneytissölu Olís við Álfheima. Þegar Þór rankaði við sér var honum gefinn kostur á að ganga út úr versluninni en virti hann lögreglumennina ekki viðlits.

„Hafi hann byrjað að ausa úr sér fúkyrðum og niðrandi ummælum í garð lögreglumanna og hann verið færður í handjárn til að tryggja öryggi hans sem og lögreglumanna. Er lögregla hafi ekið frá Olís á Suðurlandsbraut við Grensásveg hafi maðurinn sagst ætla að verða sér út um skotvopn og koma heim til lögreglumanna og skjóta þá. Hafi maðurinn einnig sagst ætla að fara á mannaveiðar. Hafi lögreglumenn stöðvað lögreglubifreiðina og spurt manninn hvað hann hafi verið að segja og hafi hann endurtekið orð sín og aftur sagst ætla að koma heim til lögreglumanna og skjóta þá,“ segir í dómi Héraðsdóms.

Einn þyngsti dómur Íslandssögunnar

Þór Óliver Gunnlaugsson, sem áður hét Þórhallur Ölver og oft er kallaður Vatnsberinn, fékk sextán ára fangelsisdóm árið 2000 fyrir að bana Agnari W. Agnarssyni. Árið 2004 fékk hann svo tveggja og hálfs árs fangelsisdóm fyrir skjalafals og að reyna að svíkja fé út úr dánarbúi Agnars.  Þór hlaut viðurnefnið Vatnsberinn í tengslum við stórfelld svik á virðisaukaskatti í tengslum við vatnsverksmiðju í Hafnarfirði árið 1995. Þetta var einn þyngsti dómur Íslandssögunnar af þessum toga.

Síðan hefur hann fengið fjölda styttri dóma. Hann strauk af Litla-Hrauni í júlí 2011 en var veitt reynslulausn árið eftir. Þá átti hann 2.075 daga eftir óafplánaða, sem eru tæp sex ár. Hann hefur nú hafið afplánun eftirstöðva þessara eldri dóma.

Með ákvörðun Fangelsismálastofnunar ríkisins 16. júlí 2012 var ákærða gert að afplána eftirstöðvar refsingarinnar vegna rofs sama dag á því skilyrði reynslulausnarinnar að neyta hvorki áfengis né ávana- og fíkniefna á reynslutímanum.