Eintómar vítaspyrnur á Algarve

Breiðablik vann sigur á austurríska b-deildarliðinu Mattersburg á æfingamóti á Algarve í Portúgal í kvöld.

Guðjón Pétur Lýðsson skoraði fyrsta mark leiksins á 23. mínútu úr vítaspyrnu. Liðsmenn austurríska liðsins jöfnuðu metin á 50. mínútu með frábæru skoti utan teigs.

Fleiri mörk voru ekki skoruð og var gripið til vítaspyrnukeppni. Stefán Gíslason, Jordan Halsman, Damir Muminovic og Gísli Eyjólfsson skoruðu úr sínum vítaspyrnum en varið var frá Finni Orra Margeirssyni. Gunnleifur Gunnleifsson varði fimmtu spyrnu Austurríkismannanna og tryggði Blikum sigur.

Á morgun mætir FH sænska liðinu Örebro í sama átta liða æfingamóti. Leikurinn verður sýndur beint á Eurosport 2 klukkan 15.45.