Varð ekki vör við útsendarana hér á landi

Food and Travel Magazine tilnefnir Salt Eldhús, sem er kennslueldhús í Reykjavík,  eitt af 50 bestu kennslueldhúsum í Evrópu. Ekki nóg með það heldur varð Salt Eldhús á topp 5 lista yfir bestu kennslueldhúsin í Norður-Evrópu í vali blaðsins. 

Auður Ögn Árnadóttir eigandi Salt Eldhús varð ekki vör við útsendara blaðsins hér á landi.

„Þeir virðast hafa laumað sér á „Local in Focal“ en það eru námskeið sem eru í boði daglega fyrir erlenda ferðamenn og er þar kennt á ensku“ segir hún og útskýrir að á þessum námskeiðum er farið í íslenskt hráefni, sérstöðu þess og ferskleika og matreitt samkvæmt norræna eldhúsinu sem er svo vinsælt um þessar mundir.

Féllu fyrir íslenska hráefninu

„Ætli það sé ekki þetta ferska íslenska hráefni sem þeir hafa fallið fyrir, ásamt stemmingunni sem við reynum að skapa á hverju námskeiði.  Þeir virðast þó hafa haft veður af þeirri dagskrá sem er í boði fyrir innlenda gesti Salt Eldhúss, því þeir minnast á bláberjabökur og fleira spennandi, ásamt því hversu bjart og fallegt húsnæðið sé,„ bætir hún við. 

„Það sem fólk virðist helst falla fyrir er stemningin á námskeiðunum, sameiginlega borðhaldið í lokin, þegar við njótum afrakstursins með glasi af góðu víni og að eiga þess kost að prófa sig áfram með eitthvað nýtt í matargerðinni, hvort sem er á opnu námskeiði  eða einkanámskeiði með vinum eða vinnufélögum“ segir Auður.

„En mér finnst einmitt gleðilegt hversu stóran hóp ég á af fastakúnnum sem koma aftur og aftur til að upplifa einmitt þetta. Ég segi það oft að eiginlega eini munurinn á því að eiga kvöldstund á Salti Eldhúsi eða veitingahúsi sé sá, að í stað þess að kokkurinn sé að elda fyrir þig, þá eldar hann með þér. Þjónustan sem við veitum er að öðru leiti svipuð, við þjónum til borðs þegar það á við, erum með uppvaskara og aðstoðarmenn á okkar snærum sem dekra við gestina.“

Hvenær kviknaði þessi hugmynd hjá þér að opna kennslueldhús?  

„Hugmyndin var að sjálfu sér ekki mjög gömul, en það tók mig töluverðan tíma að finna rétt húsnæði og þegar það var komið, tók framkvæmdin ekki langan tíma. Það hefur svo tekið þessi tvö ár að festa sig í sessi og vitund fólks. Ég hef aldrei auglýst neitt og treysti á að ánægðir viðskiptavinir beri hróður eldhússins víða. Það er stragetía sem virðist hafa virkað í mínu tilfelli, því það er nóg að gera.“ 

Hvað er það svo við þetta starf sem heillar? 

„Ég starfaði áður sem stílisti og tók þá að mér ýmis konar verkefni eins og að stílisera heimili fólks og fyrirtækja, myndatökur, brúðkaup og margt fleira. Það var svo þessi ástríða mín fyrir matargerð og því að skapa fallega stemningu sem leiddi áfram,„ segir Auður.