Umfjöllun, viðtöl og einkunnir: Stjarnan - Fjölnir 2-1 | Stjarnan tyllti sér á toppinn

Stjarnan komst á topp Pepsi-deildarinnar eftir 2-1 sigur á Fjölnir á Samsung-vellinum í kvöld. Staðan í hálfleik var 1-0.

Fjölnismenn voru ekki lakari aðilinn úti á vellinum í fyrri hálfleik, en sóknarleikur þeirra var ákaflega bitlaus og ekki jafn kraftmikill og hann hefur oft verið í flestum leikjum sumarsins.

Hvorugur kantmanna liðsins, Aron Sigurðarson og Viðar Ari Jónsson, komst inn í leikinn og fyrir vikið fékk fremsti maður gestanna, Þórir Guðjónsson, litla þjónustu.

Martin Rauschenberg og Daníel Laxdal, miðverðir Stjörnunnar áttu ekki í miklum vandræðum með að ráða við sóknir gestanna og markvörðurinn Ingvar Jónsson sá um það litla sem slapp í gegnum Stjörnuvörnina.

Heimamenn buðu heldur ekki upp á neinar leiftursóknir, en það skapaðist þó jafnan meiri hætta þegar þeir komust á síðasta þriðjunginn en gestirnir. Veigar Páll Gunnarsson minnti reglulega á sig og Jeppe Hansen var sterkur við hlið hans í framlínunni.

Sá síðarnefndi skoraði eina mark fyrri hálfleiks á 17. mínútu þegar hann slapp einn innfyrir Fjölnisvörnina, lék á Þórð Ingason í markinu og renndi boltanum í netið. Skömmu síðar hafði verið dæmt mark af Fjölnismönnum, sem var líklega réttur dómur.

Fjölnismenn byrjuðu seinni hálfleikinn af talsverðum krafti og settu Stjörnuvörnina undir pressu sem skilaði árangri á 55. mínútu þegar fyrirliðinn Bergsveinn Ólafsson stýrði boltanum í netið eftir mikinn barning í vítateig Stjörnunnar í kjölfar hornspyrnu. Þetta var fyrsta mark Bergsveins í efstu deild.

Fátt markvert gerðist næstu mínúturnar eða allt þar til Ólafur Karl Finsen, sem hafði ekkert sést í leiknum, sendi Hansen í gegnum Fjölnisvörnina. Bergsveini tókst hins vegar að þrengja færið og Þórður varði skot Danans.

Lokakafli leiksins einkenndist af mikilli baráttu og hvorugt liðið náði almennilegri stjórn á leiknum.

Sóknarleikur heimamanna var hugmyndasnauður með afbrigðum og síðustu 20 mínútur leiksins gerðu þeir lítið annað að sparka boltanum hátt og langt fram með litlum árangri.

Leikurinn virtist vera að fjara út þegar Stjörnumenn fengu hornspyrnu þegar þrjár mínútur voru komnar fram yfir venjulegan leiktíma.

Hana tók Veigar Páll. Hann sendi boltann á  Daníel - besta mann vallarins - sem skallaði boltann í stöngina, en varamaðurinn Garðar Jóhannsson var réttur maður á réttum stað, kom boltanum yfir línuna og tryggði Garðbæingnum gríðarlega mikilvægan sigur í toppbaráttu Pepsi-deildarinnar.

Stjarnan er nú með 19 stig á toppi deildarinnar, einu stigi á undan FH sem leikur gegn Fram á morgun.

Fjölnismenn töpuðu sínum þriðja leik í deildinni í röð, en það hefur heldur hallað undan fæti hjá þeim eftir góða byrjun í vor.

Ingvar: Danni flaug eins og Jordan

"Það er ansi sætt að vera á toppnum, það er þar sem við viljum vera og vonandi verður það svo," sagði Ingvar Jónsson markvörður Stjörnunnar eftir sigur Garðbæinga á Fjölni á Samsung-vellinum í kvöld. En hvað fannst Ingvari um leik hans manna?

"Við byrjuðum af krafti, en síðan dró af okkur, eins við værum að bíða eftir að fá á okkur mark til að vakna aftur.

"Þetta var frekar slakur leikur af okkar hálfu, að mér fannst, fyrir utan fyrstu 20 mínúturnar. En það var sætt að stela þessu í lokin.

"Þetta var kannski ekkert svakalega sanngjarnt, en það var mikilvægt að vinna þennan leik," sagði Ingvar sem var ánægður með að hafa unnið jafnan leik.

"Það er gríðarlega mikilvægt. Jafnteflin telja lítið, sérstaklega ef þú gerir mörg, þannig að það var mjög sterkt að vinna þennan leik og mikilvægt fyrir sjálfstraustið," sagði markvörðurinn, en hafði hann trú á því að hans mönnum tækist að skora sigurmarkið undir lok leiksins?

"Við fengum hornspyrnu á síðustu sekúndunum og þá fer ósjálfrátt smá taugaveiklun um þá. Við höfðum trú á þessu. Danni (Laxdal) flaug eins og Jordan í teignum og setti hann í stöngina og Garðar fylgdi vel eftir."

Ágúst:Gríðarlega ánægður með seinni hálfleikinn

"Þetta var erfiður leikur, en mér fannst vera jafnræði með liðunum," sagði Ágúst Gylfason, þjálfari Fjölnis, eftir hans manna fyrir Stjörnunni í kvöld.

"Þeir komust í 1-0 í fyrri hálfleik en við komum sterkir til leiks í seinni hálfleik. Ég er gífurlega ánægður með seinni hálfleikinn, að hafa náð að komast inn í leikinn og jafna metin.

"Við áttum góða möguleika til að skora og vinna leikinn en svo missum við einbeitinguna í lokin og fáum á okkur mark í andlitið," sagði Ágúst, en Fjölnisliðið spilaði mjög vel í upphafi seinni hálfleiks.

"Við þurftum að jafna leikinn og reyndum að sækja hratt á þá. Við jöfnuðum leikinn fljótlega og fengum nokkur tækifæri til að klára leikinn, en fáum svo á okkur þetta skelfilega mark í lokin sem skildi á milli," sagði Ágúst.

Fjölnir hefur tapað fjórum leikjum í röð í öllum keppnum og það hefur heldur sigið á ógæfuhliðina eftir gott gengi í byrjun móts. Ágúst segist þó ekki vera farinn að hafa áhyggjur.

"Nei, alls ekki. Það er í raun bara einn hálfleikur sem hefur verið slakur hjá okkur; á móti Fram. Hinir leikirnir hafa verið jafnir og við höfum verið inni í þeim öllum, þannig að ég er enn slakur," sagði Ágúst að lokum.