Innlent

Gísli Freyr í skilorðsbundið átta mánaða fangelsi

Sunna Karen Sigurþórsdóttir skrifar
Eftir dómsuppkvaðningu í Héraðsdómi Reykjavíkur í dag.
Eftir dómsuppkvaðningu í Héraðsdómi Reykjavíkur í dag. Vísir / GVA
Gísli Freyr Valdórsson, fyrrverandi aðstoðarmaður innanríkisráðherra, var í Héraðsdómi Reykjavíkur í dag dæmdur í skilorðsbundið átta mánaða fangelsi til tveggja ára. Hann sagðist myndu una dóminum.

Gísli Freyr játaði í gærkvöld að hafa lekið minniblaði úr innanríkisráðuneytinu í nóvember í fyrra. Minnisblaðið sneri að hælisleitandanum Tony Omos, eiginkonu Omos og annarri konu. Síðastliðið ár hefur Gísli ítrekað haldið fram sakleysi sínu og til stóð að aðalmeðferð í málinu færi fram í dag. Fjölmörg vitni voru boðuð en Hanna Birna Kristjánsdóttir innanríkisráðherra og starfsmenn ráðuneytisins voru þar á meðal. Í ljósi breyttrar afstöðu hans fór fyrirtaka fram í morgun.

Embætti ríkissaksóknara lagði fram ný gögn í málinu á mánudag sem leiddu það í ljós að búið var að eiga við minnisblaðið áður en það var sent úr ráðuneytinu til fjölmiðla.

Helgi Magnús Gunnarsson vararíkissaksóknari sagði að rannsóknin hefði leitt það í ljós að Gísli Freyr hefði bætt við setningum um að Tony Omos væri grunaður um mansal og að grunur léki á að unnusta hans væri fórnarlamb mansals. Gísli svaraði neitandi þegar dómari spurði hann í morgun hvort gögn þessi hefðu breytt afstöðu hans.

Helgi Magnús taldi það þá ljóst að tilgangur Gísla með lekanum hafi verið til þess fallinn að hafa áhrif á umræðu um málefni hælisleitandans. Máli sínu til stuðnings vísaði hann í ummæli Gísla sem hann lét falla í Kastljósi í gær þess efnis að þegar umfjallanir um hælisleitendur eru annars vegar séu þær einhliða. Helgi Magnús vísaði þá í dóm sem féll í maí yfir Gunnari Andersen fyrir að miðla trúnaðargögnum til DV um alþingismanninn Guðlaug Þór Þórðarson. Gunnar var dæmdur í tólf mánaða skilorðsbundið fangelsi.

Ólafur Garðarsson, verjandi Gísla Freys, sagði þá að í því máli hafi verið um að ræða hefnd og einskæran ásetning Gunnars. Það að Gísli hafi sent minnisblaðið til tveggja aðila hafi verið „skyndihugdetta“. Hann hefði ekki gert þetta til að hefna sín á nokkrum manni og ekki af einskærum ásetningi. Þá gagnrýndi Ólafur rannsókn lögreglu og að lögregla hefði haldið áfram rannsókn málsins eftir að búið var að gefa út ákæru.

Hann sagði að í kjölfar gagna sem lögð voru fram af hálfu ákæruvaldinu hafi hann leitað til eins færasta tölusérfræðings landsins, sem starfar hjá Microsoft, að yfirfara skýrslu lögreglu. Hann hefði gefið skýrslunni falleinkunn og sagði að grunur um breytingar á skjölum séu á veikum grunni byggður.


Tengdar fréttir

Birgitta kallar eftir afsögn Hönnu Birnu

„Þetta breytir í raun ekki neinu nema að það er komið í ljós það sem maður vissi, að þetta skjal kom frá henni eða hennar nánasta starfsliði.“

Skaðabótakröfum á hendur Gísla Frey vísað frá dómi

Ákæra saksóknara og bótakröfur á hendur Gísla Frey Valdórssyni, aðstoðarmanni innanríkisráðherra, skulu reknar sem sitt hvort dómsmálið. Þetta var niðurstaða héraðsdóms Reykjavíkur í morgun.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.