Elta íslensku landsliðsstelpurnar á röndum

Tveir ungir Þjóðverjar, Julia og Sandra, fengu að fylgjast með æfingu íslenska kvennalandsliðsins á hádeginu en þær eru báðar brennheitar áhugamanneskjur um liðið.

Þær gerðu sér sérstaka ferð hingað til lands til að fylgjast með leik liðsins gegn Serbíu annað kvöld. Julia og Sandra hafa einnig séð fjölmarga leiki Íslands á erlendri grundu og eru að koma til Íslands í annað skipti.

„Við ferðumst vítt og breitt um Evrópu til að fylgjast með sænska og íslenska landsliðinu,“ sagði Sandra. „Það höfum við gert í fjögur ár. Á þessu ári höfum við farið til Möltu, Danmerkur, Sviss og Algarve til að sjá íslenska liðið spila.“

Julia segir að í fyrstu hafi áhugi þeirra fyrst og fremst beinst að sænska landlsiðinu og sænskri knattspyrnu. „Margir Íslendingar hafa spilað í Svíþjóð og þannig kynntumst við íslenskri knattspyrnu fyrst. Síðast þegar við komum til Íslands vorum við í viku og sáum líka leiki í íslensku deildinni.“

Þær segja að upphaflega hafi áhugi þeirra á skandinavískri knattspyrnu hafi kviknað á HM 2003. „Þýskaland vann Svíþjóð í úrslitaleiknum og okkur fannst það svo leitt fyrir hönd Svía sem spiluðu svo vel í leiknum. Þá byrjðum við að kynna okkur sænska boltann.“

Julia segir erfitt að giska á hversu marga leiki þær hafa farið á með landsliðunum tveimur. Líklega sé það í kringum 50 leiki.

„Árangur Íslands er áhugaverður,“ sagði Sandra. „Landið er lítið en landsliðið hefur náð frábærum árangri og nær oft að standa í stórum þjóðum, líkt og á EM í Svíþjóð í sumar. Það er synd að Ísland komst ekki á HM en liðið lenti í mjög sterkum riðli.“

Leikur Íslands og Serbíu fer fram á Laugardalsvelli klukkan 17.00 á morgun.