Reyni tíðrætt um jakkafötin

„Þetta eru bara átök. Við og jakkafötin,“ sagði Reynir Traustason, ritstjóri DV, áður en hann hélt inn á aðalfund hlutafélags DV. Aðalfundurinn hófst öðru sinni á Hótel Natura klukkan þrjú í dag en honum var frestað síðastliðinn föstudag fram til dagsins í dag vegna ágreinings um ársreikninga.

Kosning nýrrar stjórnar útgáfufélags DV er á dagskrá framhaldsaðalfundarins. Í kjölfarið tekur ný stjórn til starfa. Samkvæmt heimildum Vísis innan úr hluthafahópnum verður boðað til stjórnarfundar sem fyrst og verður þar rætt um ráðningu nýs ritstjóra.  Reynir var þó nokkuð rólegur áður en hann gekk inn á fundinn og sagðist engar áhyggjur hafa.

„Ég lít ekki á þetta sem ég sé að fara að missa starfið. Ég lít á það þannig að ég sé að fara að skipta um starf og hef ekki áhyggjur. Þetta eru búnir að vera margir mánuðir í alls konar átökum og vitleysu og þessu verður að linna,“ segir Reynir.

„Ef ég þarf að fara þá verður það bara að vera svo. Þá vona ég að nýir eigendur, hverjir í ósköpunum þeir nú eru, fari vel með starfsfólkið og leyfi því að blómstra.“

Barátta um eignarhald

Mikill styr hefur staðið undanfarnar vikur um eignarhald á útgáfufélagi DV. Björn Leifsson, jafnan kenndur við líkamsræktarstöðina World Class, keypti rúmlega 4 prósenta hlut í félaginu í gegnum einkahlutafélagið fyrr í þessum mánuði en mun Þorsteinn Guðnason, stjórnarmaður í DV, kaupa hlut hans. Sammældust Björn og Þorsteinn um að það yrði útgáfufélaginu til hagsbóta að Björn og Laugar hyrfu úr hluthafahópnum.  Því vakti nokkra athygli þegar Björn Leifsson mætti á fundinn í dag.

Framhaldsfundurinn var tímasettur klukkan þrjú en töluverðan tíma tók fyrir hluthafa að komast í fundarsal þar sem gaumgæfilega var athugað hvort fundargestir væru ekki örugglega hluthafar. Þurftu þeir að framvísa gögnum og skilríkjum af þeim sökum. Fundurinn mun líklega standa fram á kvöld.