Reynir reiknar með að hætta á DV á föstudag

Reynir Traustason ritstjóri DV reiknar með því að hætta störfum á föstudaginn í kjölfar þeirra breytinga á eignarhaldi miðilsins, sem átt hafa sér stað að undanförnu.

Þetta kom fram í viðtali við Reyni í útvarpsþættinum Harmageddon á X-inu í morgun. Reynir sagðist þar ekki geta unnið með mönnum eins og Birni Leifssyni eða Þorsteini Guðnasyni.

Eins og sagt var frá í gær hefur fyrirtækið Laugar ehf, sem er í eigu Björn Leifssonar í World Class, keypt 4,42% hlut í DV og sagði Björn í samtalið við Vísi í gær að hann vildi koma Reyni Traustasyni frá störfum.

„Auðvitað veit ég að hann vill hafa áhrif á fjölmiðilinn. Þarna er fólk að sjá algjörlega nakta tilraun til þess að kaupa út tjáningarfrelsið,“ segir Reynir Traustason, ritstjóri DV í samtali við Vísi.

Reynir segir skrýtið að menn leggi í fjárfestingar til þess eins að bola sér úr ritstjórastólnum. Með þessu sé Björn að kaupa sér þögn miðilsins, en honum hafi þótt umfjöllun DV um sig óþægileg.

„Þetta er algjörlega nakin tilraun til þess að þagga niður í fjölmiðli. Það er það sem hann ætlar sér, hann vill bara tryggja sér þögn. Björn Kristmann Leifsson er í máli við DV út af því að við höfum rofið friðhelgi einkalífs hans í ótal tilvikum á átta árum. Við höfum sagt frá glamúrnum í lífi hans, sagt frá afskriftunum, útrásarævintýrinu hans. Ég minni á það að þessi maður hefur verið algjörlega tilbúinn til þess að hringla skartgripunum sínum framan í Séð og heyrt. En hann er ekki til í að láta fjalla um svartar hliðar lífs síns,“ segir Reynir.  

Mun koma aftur þótt óvinurinn nái að hrekja hann í burtu

Reynir segir að sér séu allir vegir færir þótt hann víki úr starfi ritstjóra DV. Hann segist frekar hafa áhyggjur af stöðu DV, sem fjölmiðils.

„Ég óttast um stöðu DV, ég óttast um stöðu þessa frjálsa fjölmiðils á landi þar sem fjölmiðlar eru mikið niðurnjörvaðir í eignarhald. Ég óttast ekkert um sjálfan mig, mér eru allir vegir færir. Ef það er þannig að það verður hægt að reka mig á mánudaginn, þá mun ég fara til fjalla og njóta lífsins, en ég mun koma aftur.“

Reynir segist vona að ritstjórn DV muni ekki láta láta nýja eigendur hafa áhrif á sig. Aðkoma Björns Leifssonar að eignarhaldinu séu slæm tíðindi fyrir starfsfólk miðilsins, sem og aðra hluthafa DV.

„Ég treysti því og trúi að ritstjórn DV, með eða án mín, muni passa upp á það að láta ekki einhver rustamenni þagga niður í sér. Ég veit reyndar að það er þannig, þetta er sterk ritstjórn og góð. Ég sé hérna vanlíðan á hverjum manni þegar nefndur er Bjössi í World Class. Hann er svartur blettur á hluthafahópi DV,“ segir Reynir

„Ég er afskaplega glaður maður, og ég er alveg til í að hverfa ef að óvinurinn nær að hrekja mig í burtu. En ég mun alltaf koma aftur. Ef að ég verð rekinn þá er það bara enn einn ritstjórinn á einni viku. Þá segi ég bara: Menn skulu ekkert halda að ég fari langt. Það er mesti misskilningur,“ segir Reynir að lokum.



Hægt er að hlusta á viðtal Harmageddon við Reyni í spilaranum efst í fréttinni og á útvarpssíðu Vísis.