Sneri við taflinu og æfir nú fyrir maraþonið

Rúmlega sex ár eru liðin frá því að Ívari Trausta Jósafatssyni barst það sem hann kallar „wake-up call“ varðandi heilsu sína. Hann var þá orðinn rúmlega hundrað kíló á þyngd, fékk ekki að gefa blóð í Blóðbankanum vegna of hás blóðþrýstingsins og var ráðlagt af hjartalæknum að byrja að taka þynningarlyf. Í dag æfir Ívar Trausti af fullu kappi fyrir komandi Reykjavíkurmaraþon en ótrúlegur viðsnúningur hans í heilsufarsmálum er fyrst og fremst af hans eigin völdum.

„Ég vildi alls ekki fara á þynningarlyf og taldi mig í raun alveg geta snúið þessu við,“ segir hinn 53 ára íþróttagarpur. „Hægt og rólega gerði ég það. Þetta voru engin læti, bara skynsemi.“ Ívar hefur mikla reynslu af því að hreyfa sig en hafði gert lítið af því í tíu ár þegar það rann upp fyrir honum að hann þyrfti að taka sig á. Hann segist aldrei hafa leitað til einkaþjálfara eða lækna og einungis notast við eigin íþróttareynslu og þekkingu í næringarfræði.

„Ég hef alveg gert allt sjálfur. Ég set upp hlaupaprógrömm og styrktaræfingar fyrir aðra og kann alveg á næringu og allt þetta sjálfur,“ segir hann. „Það er ekkert mjög erfitt fyrir mig að gera þetta, en þá getur maður líka bara deilt því frekar.“ Á Facebook-síðu Ívars setur hann reglulega inn efni í aðdraganda maraþonsins. Þar segir hann meðal annars frá sérstökum æfingum  sem hann hefur tileinkað sér til að takast á við meiðsli sem hafa hrjáð hann, meðal annars í mjóhrygg og bólgu í hásinum. Hann segir þetta meðal annars gert til að hvetja aðra til að láta ekki meiðsli og önnur vandamál aftra sér frá því að hreyfa sig.

„Ég geri ekki svona vanalega. En þetta eru allt kvillar sem fullt af fólki er með, bæði yfirþyngd, hár blóðþrýstingur og ýmsar bólgur hér og þar, “ segir Ívar. „Þó að það þýði smá athygli, þá er ágætt ef þetta hjálpar eitthvað. Ég þekki svo marga í hjólum, hlaupi, þríþraut og svona sem eru endalaust að meiða sig og lenda í stoppi. Þá er ágætt að deila því hvernig maður hefur lært á sjálfan sig að forðast þetta.“

Ívar er nú rúmlega 72 kíló og stefnir á að klára maraþonið á innan við tveim klukkutímum og fimmtíu mínútum. Þess má geta að sigurvegari í Íslandsmeistaramóti karla í maraþoninu í fyrra, Pétur Sturla Bjarnason, lauk hlaupi á tveimur klukkutímum og 46 mínútum.

„Eftir það er aðalatriðið að halda sér heilum og halda áfram að bæta sig bara,“ segir Ívar um framhaldið.

Innlegg frá Ivar Trausti Josafatsson.