Pepsi-mörkin: Eyjamenn gáfu fyrstu tvö mörkin | Myndband

Fylkir vann ÍBV, 3-1, í Pepsi-deild karla í fótbolta í gærkvöldi, en fyrstu tvö mörk leiksins fannst Sigurði Ragnari Eyjólfssyni, þjálfara ÍBV, vera nokkuð ódýr af hálfu lærisveina sinna.

Þorvaldur Örlygsson, sérfræðingur Pepsi-markanna, var því sammála og teiknaði upp sóknina sem Fylkir skoraði fyrsta markið úr.

„Vestmannaeyjaliðið var allt í lagi að verjast. Hér sjáum við vörn og miðju í góðum málum - allt fínt. Það eru nógu margir menn fyrir aftan boltann,“ sagði Þorvaldur, en hvað svo?

„Þeir fara bara ekkert í mennina. Eins og Siggi Raggi sagði þá voru þetta ódýr mörk. Tökum ekkert frá Fylki, en sjáum tímann sem þeir fá á miðjunni. Svo er það maðurinn sem sendir boltann sem nær frákastinu og skorar. Vestmannaeyingar gáfu þessi tvö fyrstu mörk.“

Umræðuna úr Pepsi-mörkum gærkvöldsins má sjá hér að ofan.