Kristján tók fram skóna

Varnarmaðurinn Kristján Hauksson hefur tekið fram skóna á ný og mætti í gær á sína fyrstu æfingu hjá Fylki í sumar.

Kristján ákvað að leggja skóna til hliðar eftir síðasta tímabil vegna anna í læknanámi en þessi öflugi varnarmaður kom við sögu í alls sextán leikjum með Fylki í fyrra.

„Ég var nú reyndar aldrei búinn að gefa það endanlega út að ég væri hættur,“ sagði Kristján í samtali við Vísi í dag. Hann kom til Fylkis á vormánuðum í fyrra eftir að samningi hans við Fram var óvænt rift.

„Svo þegar ég fór að mæta á völlinn í sumar kitlaði mikið að byrja aftur. Ég fann svo hvað mér fannst þetta skemmtilegt þegar ég fór á æfingu í gær,“ sagði hann.

„Ég reyni því að halda áfram að mæta á æfingar og það yrði svo bara bónus að fá að spila eitthvað í deildinni. Ég er ekki í standi til þess núna en ég held að formið verði nokkuð fljótt að koma hjá mér.“

Hann segir að það hafi verið vel tekið á móti honum í gær. „Það var mjög gaman að hitta strákana,“ segir Kristján en þess má geta að Hermann Hreiðarsson hefur einnig verið að mæta á æfingar hjá Fylki í sumar án þess að spila.

„Hann mætir nú bara til að taka þátt í reitarbolta og spili. Maður sá það strax,“ sagði Kristján í léttum dúr.