United bauðst James en keypti Bebé í staðinn

Kólumbíumaðurinn JamesRodríguez hefur farið á kostum á HM í Brasilíu en hann er búinn að skora í öllum leikjum liðsins á mótinu, í heildina fimm mörk, og gefa þar að auki tvær stoðsendingar.

Hann skoraði bæði mörkin, þar af eitt af mörkum mótsins, í 2-0 sigri liðsins á Úrúgvæ í 16 liða úrslitum um helgina, en Kólumbíumenn mæta Brasilíu í næstu umferð.

James spilar með Mónakó í frönsku 1. deildinni, en þaðan kom hann frá Porto í Portúgal. Manchester United bauðst að kaupa þennan frábæra leikmann fyrir fjórum árum, þá sautján ára að aldri, en kaus að fara aðra leið í sínum leikmannamálum.

Frá þessu greinir vefútgáfa enska blaðsins The Guardian en það segir umboðsmenn hafa reynt að selja strákinn til United fyrir fimm milljónir punda. Sir Alex Ferguson var upptekinn við að kaupa Javíer Hernandez á sama tíma og sýndi víst lítinn áhuga á Kólumbíumanninum.

Ferguson reif þó aftur upp veskið aðeins síðar um sumarið eftir að hann var búinn að kaupa Hernández. Það var þó ekki til að kaupa James, heldur Portúgalann Bebé sem hann hafði aldrei séð spila. Það er vægt til orða tekið þegar sagt er að Bebé hafi ekki sannað sig á Old Trafford.

United og Chelsea sýndu bæði áhuga á að kaupa James síðasta sumar en verðmiðinn á honum var þá orðinn svakalegur. Að auki á þriðji aðili stóran hluta í leikmanninum sem gerir félagaskipti til Englands nær ómöguleg en eignarhald í gegnum þriðja aðila er bannað í ensku úrvalsdeildinni.

James fór þess í stað til Mónakó fyrir 45 milljónir Evra og er á topp 20 listanum yfir dýrustu leikmenn sögunnar.