Jacques Bergerac látinn

Franski leikarinn Jacques Bergerac lést á heimili sínu í Suðvestur-Frakklandi þann 15. júní síðastliðinn, 87 ára að aldri.

Jacques er þekktur fyrir að leika í Les Girls með Gene Kelly og Gigi með Leslie Caron.

Jacques var laganemi þegar hann hitti leikkonuna Ginger Rogers í fríi í Frakklandi. Hún fékk áheyrnarprufu fyrir hann hjá MGM sem leiddi til þess að þau léku saman í Twist of Fate árið 1954. 

Jacques og Ginger giftu sig í febrúar árið 1953 en skildu í júlí árið 1957. Leikarinn kvæntist Dorothy Malone í júní árið 1959 en þau skildu í desember árið 1964.

Jacques hætti í kvikmyndabransanum um árið 1960. Árið 1963 tók hann við stjórnunarstöðu hjá snyrtivöruframleiðandanum Revlon. 

Hann skilur eftir sig tvær dætur, Mimi og Diane, sem hann átti með Dorothy.