Vöruverð lækkar í kjölfar fríverslunarsamnings

Fríverslunarsamningur milli Íslands og Kína tekur gildi á þriðjudaginn. Samingnum er ætlað að bæta verulega viðskiptakjör milli Íslands og Kína en hann kveður á um niðurfellingu tolla á helstu útflutningsafurðum Íslendinga.

Allar sjávarafurðir verða tollfrjálsar, en 90% alls útflutnings til Kína eru sjávarafurðir. Forsvarsmenn í íslenskum sjávarútvegi, sem fréttastofa hefur rætt við í dag, segja samninginn bjóða upp á gríðarleg tækifæri. En áhrifanna gætir víðar.

Tökum skópar, sem framleitt er í Kína, sem dæmi. Til að einfalda dæmið skulum við gefa okkur að það kosti 10.000 krónur með flutningskostnaði og öðrum kostnaði. Ofan á það bætist 15% tollur og 25,5% virðisaukaskattur. Heildarverð í dag er því  14.443 krónur.

Eftir gildistöku fríverslunarsamningsins fellur þessi tollur niður. Við erum því með skó sem kosta 10.000 krónur, bera engan toll og virðisaukaskatt upp á 25,5%. Alls 12.550. Þarna getum við sparað tæpar 1.900 krónur eða 13%.

„Já klárlega. Vöruverð lækkar, það er alveg klárt. Við fögnum þessum samningi. Þetta er eitthvað sem við erum búin að vera að berjast fyrir. Fríverslunarsamningar eru mikið hagsmunamál fyrir verslunina og við teljum að þetta sé leið til lækkunar vöruverðs. Þannig að neytendur fagna og við fögnum“, segir Margrét Sanders, formaður Samtaka verslunar og þjónustu.

Fjöldi sendinga frá Kína til Íslands hefur margfaldast undanfarin ár, þá ekki síst fyrir tilstilli netverslana líkt og hinnar kínversku aliexpress.com. En mun fríverslunasamningurinn ekki hafa þau áhrif að Íslendingur versli í auknum mæli í gegnum slíkar síður?

„Netverslun er eitthvað sem er komið til að vera. En við teljum að ef við erum að bjóða samkeppnishæf verð, sem við erum að gera, og með fríverslunarsamningnum er vöruverð að lækka á Íslandi, að þá fáum við fleiri inn í verslaninnar, og þá eykst verslunin, þá fjölgar starfsfólki, og allir hagnast á þessu“, segir Margrét.