Enn fjölgar ferðamönnum

Um 59 þúsund erlendir ferðamenn fóru frá landinu í nýliðnum apríl sem eru um 13.500 fleiri en í apríl á síðasta ári. Þetta er samkvæmt talningum Ferðamálastofu í Flugstöð Leifs Eiríkssonar og þýðir um tæplega þrjátíu prósenta fjölgun ferðamanna í apríl milli ára.

Ferðamannaárið fer sérlega vel af stað en Ferðamálastofa hefur birt fréttir um aukningu í öllum mánuðum það sem af er ári eða 40 prósenta aukningu milli ára í janúar, rúmlega 30 prósenta aukningu í febrúar og rúmlega 35 prósenta aukningu í mars.