Sumaropnunartími sundlauga óháður kosningabaráttunni

Stjórn Íþrótta og tómstundarráðs Reykjavíkur (ÍTR) samþykkti á föstudaginn að lengja skyldi opnunartíma Árbæjarlaugar og Vesturbæjarlaugar til klukkan átta um helgar í sumar. Það er lenging um klukkustund miðað við síðasta sumar.

Laugardalslaug verður opin til klukkan tíu alla daga í sumar.

Aðrar laugar loka klukkan sjö um helgar í sumar.

Diljá Ámundadóttir, fulltrúi Besta Flokksins í stjórn ÍTR, hafnar því að lenging opnunartíma tengist því að rúmar tvær vikur séu í kosningar. Hún segir að sumaropnunartími sé eðlilega samþykktur í byrjun sumars.