Þegar KA mætti Man. Utd: Sérstakt að muna lítið eftir Beckham

„Paul Scholes kom inn á sem varamaður. Hann var lítill og pattaralegur. Gerði sér samt lítið fyrir og skoraði þrennu. Öll með skalla,“ segir Sigþór Júlíusson en hann var hluti af mjög sterku liði KA sem lék gegn mörgum af goðsögnum Man. Utd árið 1991.

Þessi leikur á milli KA og Man. Utd fór fram í móti sem heitir Milk Cup og haldið var á Írlandi. Á mótið var boðið sterkustu liðum margra landa. KA mætti með 3. flokkinn sinn á mótið en í liði KA voru meðal annars Húsvíkingarnir Sigþór og Guðni Rúnar Helgason sem og Þórhallur Hinriksson. Þeir áttu allir eftir að láta til sín taka í efstu deild síðar á ferlinum.

Í liði Man. Utd voru engar smá kempur. Nægir þar að nefna stráka eins og Gary Neville, Keith Gillespie, Nicky Butt, Paul Scholes, Ben Thornley, Robbie Savage og sjálfan David Beckham. Þjálfarar liðsins voru svo Brian Kidd, aðstoðarmaður Ferguson til margra ára, og Nobby Stiles sem var í HM-liði Englands árið 1966.

„Við vorum með mjög gott lið hjá KA og vorum sæmilega brattir með að geta staðið eitthvað í þeim. Í minningunni var leikurinn jafn en okkur fannst ótrúlegt að þeir refsuðu fyrir nær öll mistök með marki,“ segir Sigþór en Man. Utd vann leikinn 9-1 og Sigþór minnti að Brynjólfur Sveinsson hefði skorað mark KA í leiknum.

Það mættu um 3.000 áhorfendur á þennan leik en hvernig stóð David Beckham sig?

„Mér finnst mjög sérstakt að muna lítið sem ekkert eftir Beckham úr leiknum. Sá sem stóð upp úr hjá þeim og var valinn maður leiksins var Ben Thornley. Ferill hans varð síðan ekki merkilegur eins og margir muna.“

Thornley spilaði á vinstri kantinum í leiknum á móti hinum eitilharða Þórhalli Hinrikssyni sem aldrei er kallaður annað en Júri.

„Júrí var alltaf röskur á fyrstu og síðustu metrunum en hann átti ekkert í hann á sprettinum. Það sat alltaf aðeins í Júra kallinum,“ segir Sigþór glettinn en hann lenti sjálfur á móti Keith Gillespie á hinum kantinum og gekk litlu betur.

„Hann var einnig mjög fljótur og góður á þessum tíma. Ég átti ekki heldur mikið í hann á sprettinum. Í minningunni var þetta jafn og skemmtilegur leikur og lokatölurnar segja alls ekki alla söguna.“