„Ekki í takt við það sem íbúar Garðabæjar eru upplýstir um”

„Þetta eru sláandi niðurstöður og ekki alveg í takt við það sem íbúar Garðabæjar eru upplýstir um”, segir Einar Karl Birgisson oddviti Framsóknar í Garðabæ um niðurstöður könnunar sem birtust í skýrslu Samtaka sveitarfélaga á höfuðborgarsvæðinu í mars.

Fyrr í dag sagði Vísir frá því að unglingar í Garðabæ væru daprari en annars staðar á höfuðbrogarsvæðinu, einelti á miðstigi væri algengara og slagsmál á unglingastigi tíðari. Garðabær hefur myndað samstarfshóps um málið og forstöðukona menningar- og fræðslusviðs Garðabæjar sagði þá að þar á bæ væri niðurstöðum könnunarinnar tekið mjög alvarlega.

Einar Karl er ósáttur við að bæjaryfirvöld í Garðabæ hafi ekki vakið athygli á þessu vandamáli þegar skýrslan kom út á sínum tíma, heldur einblínt á það sem kæmi vel út fyrir bæinn. „Greinileg vanlíðan barna á miðstigi er staðreynd í Garðabæ, meira einelti en í grunnskólum á höfuðborgarsvæðinu og tíðari slagsmál eru vandamál sem þarf að tala um og bregaðst við. Það má ekki sleppa því bara að tala um vandamálin í samfélaginu eins og þarna hefur verið gert. Hér þarf klárlega aðhald og eftirlit í stjórnsýslunni, og nauðsynlegt að fleiri raddir heyrist í bæjarstjórninni.“

Einar Karl bætir við:

„Ég hef kynnt mér skýrsluna og að mínu mati  þurfum við að doka hér við, Garðabæ ber skylda til að taka þessar ábendingar alvarlega. Garðabær verður að  taka þessi mál fastari tökum  og grípa strax inn í. Einelti á ekki að líðast í nokkurri mynd. Heildstæð stefna og öflug vinna í eineltismálum þarf að vera uppi á borðum og allir sem að starfi með börnum í Garðabæ koma þurfa að vinna samtaka eftir henni. Þannig er eini möguleikinn að láta börnum okkar líða vel og þá mun námsárangurinn verða enn betri.“  

Sem fyrr segir hefur starfshópur verið stofnaður. „Við stofnuðum risastóran samstarfshóp sem við köllum Kynheilbrigði og velferð. Við erum að taka á ýmsum málum sem tengjast líðan nemenda í skólum og bæjarfélaginu. Við höfum fengið til liðs við okkur aðila frá íþróttafélögunum, skátunum og fleiri frjálsum félagasamtökum í bænum,“ útskýrði Margrét Björk Svavarsdóttir, forstöðukonar fræðslu- og menningarsviðs Garðabæjar fyrr í dag.

„Ég fagna því að vinna við þessi mál sé hafin, og ítreka að það þarf að taka hana föstum tökum. Klárlega þarf að vinna þetta með félagasamtökum, eins og íþróttafélögum, því að svona mál smitast oft þangað líka,“ segir Einar Karl að lokum.