Neitar því að hafa blekkt kjósendur

Fyrrverandi velferðarráðherra neitar því að hafa blekkt kjósendur með því að undirrita viljayfirlýsingu um hjúkrunarheimili við Sléttuveg, rétt fyrir kosningar í fyrra. Heilbrigðisráðherra sagði í gær að ekkert fjármagn hefði fylgt yfirlýsingunni.

Borgarstjórn skoraði í vikunni á Kristján Þór Júlíusson, heilbrigðisráðherra, að standa án tafar við viljayfirlýsingu forvera hans, Guðbjarts Hannessonar, um byggingu hjúkrunarheimilis við Sléttuveg. Í fréttum Stöðvar 2 í gær sagði Kristján hins vegar að ekkert fjármagn hefði fylgt viljayfirlýsingunni sem undirrituð var rétt fyrir þingkosningar í fyrra.

Guðbjartur hafnar því að um kosningabrellu hafi verið að ræða. „Það er þannig að þegar gefnar eru út viljayfirlýsingar er verið að forgangsraða,“ segir hann. „Viljayfirlýsingin fól í sér vilja til að setja verkefnið inn í fjárlög en síðan var skipt um ríkisstjórn og hún valdi að setja ekki fjármagn í þetta. Ábyrgð á því að fjármagn er ekki til staðar er því nýrrar ríkisstjórnar en ekki þeirra sem skrifa undir viljayfirlýsinguna.“

Varstu þá ekki að blekkja kjósendur?

„Að sjálfsögðu ekki, enda var ekki verið að lofa neinu á einhverjum ákveðnum tíma, það var bara verið að gefa skilaboð um að þarna ætti að byggja næst,“ segir Guðbjartur.

En er rétt að í raun og veru var aldrei búið að eyrnamerkja þessu verkefni neitt fjármagn?

„Það var ekki komið inn nei, það er alveg rétt,“

Guðbjartur er ósáttur við skýringar heilbrigðisráðherra.

„Mér finnst almennt mjög aumt að skýra það að einhverjum ákvörðunum er ekki fylgt eftir með því að ekki liggi fyrir fjármagn, á sama tíma og menn eru að skera niður og hæla sér af því, um 25 milljarða í skattheimtu á þá sem betra hafa það, hvort sem það eru fyrirtæki eða einstaklingar,“ segir Guðbjartur.