Lífið

„Klárlega markmiðið að verja titilinn“

Stefán Árni Pálsson skrifar
Sindri Snær sló í gegn á Boladeginum í fyrra.
Sindri Snær sló í gegn á Boladeginum í fyrra. mynd/samsett
Knattspyrnumaðurinn og tískuspekúlantinn Sindri Snær Jensson var valinn Bolur ársins 2013. Sindri fór hamförum á Boladaginn sem fram fór á Twitter en leikurinn snýst um að fá svör frá erlendum stjörnum.

„Ég sit hér með kaffibolla og er að halda mig við efnið,“ segir Sindri Snær sem hefur verið iðinn við kolann í að tísta síðan í gærkvöld.

„Ég fer eftir ákveðnari leikaðferð sem fellst í því að leggja fram gildru hér og þar á Twitter. Þetta eru svona litlar setningar hér og þar sem tekur stutta stunda að tísta. Núna eru að detta inn nokkur svör frá frægu fólki og ég held að ég sé kominn með svona átta svör í það heila.“

Sindri segir að hann notist mestmegnis við það að tengja Ísland við tístin sín.

„Maður er að segja við fólk að það eigi fullt af aðdáendum á Íslandi og spyr það síðan hvort það geti gefið manni „reetweet“ eða sýnt Íslandi smá ást. Þetta virkar yfirleitt mjög vel en Ísland er nokkuð vinsælt erlendis.“

Í fyrra fékk Sindri 37 svör frá þekktum erlendum aðilum. Þar á meðal frá Sophia Bush, Jeri Ryan, Alyssa Milano, Matt le Tissier, Robbie Fowler, Ian Wright og Canizares. Þeir Demba Ba og John Daly fóru þess utan að elta hann. Sindri fékk virkilega góð svör frá nánast öllum sem er stór bónus.

„Ég náði lítið að undirbúa mig fyrir keppnina í ár og er að treysta mest á reynsluna að þessu sinni. Í fyrra var ég staðráðinn í því að vinna keppnina og þá undirbjó ég mig mjög mikið. Það er klárlega markmiðið að verja titilinn og mun ég geri mitt besta. Þetta er mun harðari keppni í ár og verkfallið hefur haft sín áhrif í þessari keppni, en framhaldsskólanemar eru alveg á fullu að tísta.“

Sindri tísti um 700 sinnum á Boladeginum í fyrra og var fyrir vikið settur í tímabundið bann af síðunni þrisvar sinnum. Hann lét það ekki á sig fá.

„Það eru greinilega einhverjar hömlur á því hversu mörg tíst þú mátt senda út á hverjum klukkutíma. Ég fékk í þrígang skilaboð um það í fyrra um það að ég væri að tísta of mikið. Þá var ég settur í tímabundið bann.“

Fyrirkomulag Boladagsins er að keppendur nota kassamerkið #boladagur með tístunum sínum. Fólk hefur farið frumlegar og stórskemmtilegar leiðir í viðleitni sinni og margir uppskorið ríkulega.

Fyrsta árið voru send um 9.000 tíst með merkingunni Boladagur en þau voru rúmlega 18.000 á síðasta ári. Það gerir tíst á fimm sekúndna fresti þá 27 tíma sem viðburðurinn var í gangi.


Tengdar fréttir

Tíst vikunnar

"Er í alvöru einhver að horfa á Engla alheimsins á vod-inu en ekki United-Bayern?“



Mest lesið


Fleiri fréttir

Sjá meira


×

Mest lesið


Tarot dagsins

Dragðu spil og sjáðu hvaða spádóm það geymir.