„Tilfinningarnar á þessum degi eru ótrúlega blendnar"

„Tilfinningarnar á þessum degi eru ótrúlega blendnar,“ segir Sigurjón Jónsson, sem á þessum degi fyrir átta árum missti einn sinn besta vin. Á sama degi sex árum seinna, eða fyrir tveimur árum síðan, eignaðist Sigurjón svo son.

Einn besti vinur Sigurjóns, Kópavogsbúinn Pétur Benediktsson lést langt fyrir aldur fram, aðeins 21 árs að aldri þann 27. mars árið 2006. „Á þessum tíma árs hugsar maður mikið til Péturs. Auðvitað með sorg í hjarta. En eftir því sem árin líða hugsar maður meira um að muna eftir góðu hlutunum úr okkar vinskap,“ útskýrir Sigurjón.

Sonur Sigurjóns, sem fékk nafnið Tóbías Davíð, fæddist svo þann 27. mars árið 2012 og í dag er haldið upp á tveggja ára afmælið hans. „Í fyrstu skoðun hjá ljósmóður var þessi dagur strax settur sem líklegur fæðingadagur. Eins og margir vita er slík dagsetning ekkert heilög, sérstaklega ekki þegar um er að ræða fyrsta barn. En þetta stóðst allt saman,“ segir Sigurjón og bætir við: „Guttinn er því eins og Pétur var, ótrúlega stundvís.“

„27. mars árið 2006 var versti dagur sem ég hef upplifað og 27. mars árið 2012 var sá besti. Ég fagna afmæli Tóbíasar en minnist Péturs með söknuði,“ bætir Sigurjón við.

Hæfileikaríkur drengur og mikill leiðtogi

„Maður reynir að muna eftir öllu því góða og rifja það upp reglulega. Pétur náði að búa til svo ótrúlega margar góðar minningar á þeim fáu árum sem hann var hér með okkur,“ segir Sigurjón, en Pétur var aðeins 21 árs þegar hann lést.

„Pétur var eins og við segjum „Alt Mugligt Mand“. Hann gat gert svo ótrúlega mikið. Hann var frábær íþróttamaður og var í u16 ára landsliðinu í fótbolta. Hann var mikill leiðtogi og var fyrirliði hjá okkur í Blikum. Hann var líka góður söngvari og tók þátt í Söngvakeppni Samfés og Söngvakeppni MK. Svo var hann mikill félagsmaður og var mikið í að skipuleggja hluti,“ rifjar Sigurjón upp.

Pétur þurfti að hætta knattspyrnuiðkun ungur. „Já, bakið var farið að angra hann, þannig að hann hætti ungur en fór út í þjálfun.“

Minnst í merki Augnabliks

Stór hluti af vinahópi Péturs er hluti af knattspyrnuliðinu Augnabliki, sem leikur í fjórðu deildinni. Pétur átti stóran þátt í að endurvekja félagið. „Já hann lagði mikið á sig og til þess að minnast hans ákváðum við að setja upphafsstafina hans inn í merki félagsins. Þannig heiðrum við minningu hans.“

Sigurjón skipuleggur því barnaafmæli í dag, um leið og hann heldur á lofti minningu góðs vinar. 

„Maður er auðvitað hryggur. En maður má ekki endalaust velta sér upp úr orðnum hlut. Ég held að það sé betra að þakka fyrir þá góðu tíma sem maður fékk með þessum góða vini,“ segir Sigurjón að lokum.