Samfylking "stærsti taparinn“ á landsvísu en gæti unnið stórsigur í borginni

Grétar Þór Eyþórsson, prófessor við Háskólann á Akureyri, segir aðra mynd blasa við þegar fylgi Samfylkingingarinnar í Reykjavík er borið saman við fylgi flokksins í mörgum af stærstu sveitarfélögum landsins. Grétar fjallar um komandi sveitarstjórnarkosningar á hádegisfundi Félags stjórnmálafræðinga í Lögbergi í dag. Hann fer yfir niðurstöður síðustu kosninga og sveiflur í fylgi flokka.

„Það hafa verið gerðar kannanir í þrettán af fjórtán stærstu sveitarfélögum landsins og þegar horft er yfir heildina eru svona ákveðnar línur í því hvert stefnir. Það virðist vera sem Sjálstæðisflokkur og Framsókn séu í þessum stærstu sveitarfélögum samanlagt nokkurn veginn að halda velli frá 2010. Þess ber að geta að Sjálfstæðisflokkurinn tapaði mjög víða 2010.“

Grétar segir að svo virðist sem Samfylkingin ætli aðrar kosningarnar í röð að verða „stærsti taparinn“.

„En að þessu sögðu verðum við að horfa til þess að svona eins og ég er búinn að vera að lýsa Sjálfstæðisflokknum og Samfylkingunni að þannig er ástandið ekki í Reykjavík. Þegar við horfum yfir heildina blasir við önnur mynd en ef við horfum á Reykjavík eina. Þvert á allt annað er Samfylkingin á leið að fara að vinna stóran sigur og Sjálfstæðisflokkurinn að fara að tapa frekar illa, miðað við þessar tölur. Það hlýtur að verða að túlka þetta þannig að þetta hafi eitthvað með forystumann þeirra í Reykjavík að gera, Dag B. Eggertsson. Það er bara ekki hægt að rýna öðruvísi í þetta.“

Grétar segir Bjarta framtíð ekki ná að halda sex mönnum Besta flokksins í Reykjavík og mælast um þessar mundir með þrjá menn í borginni. Hins vegar mælist flokkurinn með ágætis fylgi í mörgum af þeim sveitarfélögum sem hann bjóði fram í og gæti staðið uppi með fimmtán sveitastjórnarmenn eftir kosningar.

Allar fréttir af sveitarstjórnarkosningunum 2014 má nálgast á Kosningavef Vísis, visir.is/kosningar.