Nam á brott páfagauk kosningastýru Samfylkingarinnar

Sá leiðinlegi atburður átti sér stað á heimili Maríu Lilju Þrastardóttur, kosningarstýru Samfylkingarinnar í borginni, um síðustu helgi þegar köttur nam á brott páfagauk heimilisins.

„Ég man oftast að loka glugganum þar sem kisi kemur stundum inn um kjallaragluggann hjá mér. Í síðustu heimsókn hafði köttur á brott með sér heimilisfuglinn hann Gauk, lítinn bláan gára,“ segir María.

Hún segir að Gaukur sé vængstýfður og geti sér því litla björg veitt.

„Eigandi Gauks er fimm ára dóttir mín hún Kría og hefur heimilislífið því verið í nokkru uppnámi undanfarna daga.“

María segir að hún hafi séð slóð af fjöðrum frá búrinu og niður að kjallaraglugganum.

„Búrið hans Gauks var oft opið og hann gat spígsporað um og kannski flögrað smá. Kötturinn hefur líklega komið inn um nótt en við mæðgurnar leituðum aðeins af honum morguninn eftir.“

María segir að búrið hafi verið nokkuð illa farið eftir atvikið.

„Ég hef verið að spyrja fólk í Vesturbænum hvort einhver kattareigandi hafi fengið „gjöf" frá sínum kisa. Okkur langar að vita fyrir víst hvort hann Gaukur sé dáinn, en það eru nú allar líkur á því.“