Farid biður Þórsara afsökunar

Farid Zato, Tógómaðurinn sem samdi eins og frægt er orðið við bæði Þór og KR, biður stuðningsmenn Þórsara afsökunar á Twitter-síðu sinni.

Þór og KR komust að samkomulagi á miðvikudaginn um að Farid myndi leika í vesturbænum í sumar en KSÍ hafði borist undirritaður samningur með beiðni um félagaskipti frá báðum félögum.

Farid áttar sig á að sumir stuðningsmenn Þórsarar eru líklega svekktir með gang mála en eðlilega voru þeir kátir með að fá jafnöflugan leikmann til sín.

„Ég vil biðja alla stuðningsmenn Þórs afsökunar sem voru ánægðir með að fá mig og sendu mér kveðjur á Twitter og Facebook,“ skrifaði Farid og lokaði tístinu með kassmerkjunum #big og #sorry.

Farid lék stórvel með Víkingi Ólafsvík í Pepsi-deildinni í sumar en hann spilaði alla 22 leiki liðsins og skoraði eitt mark.

i present my excuse to all thor fans who was happy to have me in the team and showed me by messages on twitter and facebook, #big#sorry

— farid zato (@faridzato) March 14, 2014