Formaður Devils Choice: "Það er búið að taka okkur af lífi án dóms og laga“

„Það er búið að taka okkur af lífi án dóms og laga. Við erum kallaðir glæpamenn í öllum fjölmiðlum án þess að hafa framið nokkurn glæp," segir Karl Þórðarson, formaður mótorhjólasamtakanna Devils Choice.

Eins og fram hefur komið í fjölmiðlum hefur ákvað Útlendingastofnun að vísa úr landi sex norskum meðlimum vélhjólagengisins Devils Choice, sem handteknir voru í Leifsstöð við komuna til landsins í gærkvöldi. Studdist stofnunin við hættumat greiningardeildar Ríkislögreglustjóra. Þremur meðlimum gengisins var einnig vísað úr landi í gærdag.

Lögreglan býr sig undir að fleiri meðlimir gengisins reyni að komast inn í landið í dag en koma þessara manna tengist fyrirhugaðri hátíð Devils Choice á Íslandi sem fram fer á laugardag.

Devils Choice, sem hétur áður Hog Riders, eru stuðningssamtök Vítisengla sem stjórnvöld hafa skilgreint sem glæpasamtök.

„Þetta er vægast sagt mjög undarlegt. Við skiljum ekki forsendurnar fyrir því að mennirnir fái ekki að koma inn í landið. Hog Riders hafa verið starfræktir í átta ár og lögreglan hefur ekki enn fundið ástæðu til að kalla okkur glæpasamtök. Við hljótum að vera saklausir þar til við fremjum glæp,“ segir Karl.

Spurður hvort Devils Choice á Íslandi sé ekki stuðningsklúbbur Hells Angels segir Karl: „Er það ólöglegt að vera stuðningsklúbbur Hells Angels? Þú ert ekki glæpamaður þótt þú þekkir glæpamann.“

Að sögn Karls ætlar klúbburinn að skoða réttarstöðu sína - jafnvel fara í mál við ríkið. „Þeir sem ætluðu að koma til landsins eru með hreint sakavottorð. Þeir ætluðu að koma hingað með konurnar sínar, dvelja í vikutíma og fara í verslunar- og hestaferðir,“ segir Karl.

Þess ber að geta konurnar sem fylgdu norsku mótorhjólamönnunum hingað til lands var sleppt að lokinni skýrslutöku í gær og eru þær frjálsar ferða sinna.