ASÍ mótmælir fríverslunarsamningi við Kína

Alþýðusamband Íslands mótmælir því harðlega að til standi að gera fríverslunarsamning við Kína. Í yfirlýsingu frá ASÍ segir að kínversk stjórnvöld viðurkenni ekki mannréttindi og hafi áratugum saman hunsað grundvallarsamþykktir Alþjóðavinnumálastofnunarinnar og þannig meinað launafólki að stofna frjáls stéttarfélög til að semja um sín kjör. Það sé ótrúlegt að ríkisstjórn undir forystu jafnaðarmanna skuli ætla íslenskum fyrirtækjum og íslensku launafólki að keppa á jafnréttisgrundvelli við fyriræki í Kína.

„Það er ótrúlegt að ríkisstjórn undir forystu jafnaðarmanna skuli ætla íslenskum fyrirtækjum og íslensku launafólki að keppa á jafnréttisgrundvelli við fyrirtæki í Kína, sem þurfa ekki að uppfylla nein þau skilyrði sem þau íslensku þurfa að uppfylla. Afleiðingin af þessum gjörningi er augljós. Hann mun þvinga niður launakjör hér á landi og það sem verra er, þvinga íslensk fyrirtæki til að flytja framleiðslu sína til Kína og selja hana síðan bæði hér og annarsstaðar undir íslenskum merkjum,“ segir í yfirlýsingunni.

Það sé algjört skilyrði af hálfu ASÍ, að við gerð fríverslunarsamninga við önnur ríki verði bein og ófrávíkjanleg skilyrði um að viðkomandi ríki viðurkenni og framkvæmi í raun allar grundvallarsamþykktir Alþjóðavinnumálastofnunarinnar.

Alþýðusambandið krefst þess að tilgangi heimsóknar forsætisráðherra til Kína verði breytt á þann veg að í stað undirritunar viðskiptasamnings verði teknar upp viðræður um stöðu mannréttindamála í landinu og skyldur Kína gagnvart alþjóðasamfélaginu. Mannréttindi almennings og sér í lagi grundvallarréttindi launafólks og frjálsrar verkalýðshreyfingar verða að komast á dagskrá.