Kvikmynd fyrir blinda og sjónskerta

„Við viljum með þessu verkefni hvetja sem flest kvikmyndahús á Íslandi til þess að nýta sér þessa tækni, svo hægt sé að auka þjónustu við blinda og sjónskertra í kvikmyndahúsum. Þetta felur auðvitað í sér aukinn kostnað fyrir kvikmyndahúsin, en við erum viss um að þetta er mögulegt.

Tæknin er mikið notuð í Bretlandi þar sem hún nýtur mikilla vinsælda,“ segir Ewa Marcinek, verkefnastjóri menningarverkefnisins Iceland and Poland Against Exclusion From Culture sem stendur til ársins 2016.

Verkefninu verður ýtt úr vör í tengslum við Evrópska kvikmyndahátíð með myndinni Í myrkri eftir leikstjórann Agnieszku Holland. Hátíðin hefst á laugardag og fer fram í Bíói Paradís.

Umrædd tækni er sjónlýsing og töluð þýðing á samtölum leikara yfir á íslensku í gegnum heyrnartól. Markmiðið með þessu er að gera kvikmyndina aðgengilegri fyrir blinda og sjónskerta einstaklinga. Þetta er í annað sinn sem boðið er upp á sjónlýsingu á kvikmynd á Íslandi. Reglulegir menningarviðburðir verða haldnir bæði á Íslandi og í Póllandi á meðan á verkefninu stendur.