Maggi Mix kominn á markaðinn

„Þetta var tíu ára samband, orðið svona vinasamband, ekkert svo alvarlegt," segir Maggi Mix um samband sitt við fyrrverandi kærustuna sína.

Maggi birti fyrir skömmu myndskeið, sem má sjá hér fyrir neðan, þar sem hann fór með hugleiðingu og meðal annars tjáði sig um sambandsslitin. „Maður fer núna að opna augun fyrir stelpunum. Fyrrverandi var ekkert mikið að fíla Magga Mix vörumerkið," bætir Maggi við.

Óhætt er að segja að Maggi Mix komi til með að vera einn eftirsóttasti piparsveinn landsins og getur kvenþjóðin heldur betur glaðst. „Ég lít á björtu hliðarnar, það eru fleiri fiskar í sjónum. Ég er rómantískur og veit að allar dömur fíla að fá morgunmat í rúmið," bætir Maggi við.

Maggi hefur nóg að gera þessa dagana en hann skemmtir í heimahúsum og kemur mikið fram sem plötusnúður í grunnskólum. Hann lítur björtum augum á framtíðina og mun halda áfram að skemmta sér og öðrum. „Kannski fer maður að kíkja á Gillzenegger í ræktina og koma sér í betra form," segir Maggi Mix að lokum.