"Þetta er sjálfsagður hlutur í lýðræðisþjóðfélagi"

Lagalega umgjörð skortir fyrir uppljóstrara hér á landi sem stíga fram og greina frá spillingu eða ólöglegum misgerðum á sínum vinnustöðum. Þetta segir þingmaður sem lagt hefur framvarp til laga um vernd uppljóstrara, hvort sem er í opinbera eða einkageiranum.

Nýlega var gerð rannsókn á áliti Ástrala, Breta og ÍSlendinga á uppljóstrurum og mögulegri vernd þeirra ef þeir greina frá misgerðum eða spillingu innan síns vinnustaðar.  Almennt var mikill stuðningur þessara þriggja þjóða við það að uppljóstrar fái stuðning í stað refsingar. En Íslendingar virðast hins vegar hafa litla trú á opinberum stofnunum og fyrirtækjum hér á landi til að vernda uppljóstrara.

38 % aðspurðra töldu að íslensk stofnun eða fyrirtæki myndi vernda fólk sem greinir frá misgerðum eða spillingu á meðan Ástralar og Bretar hafa meiri trú á opinberum stofnunum og fyrirtækjum í sínum löndum eða tæplega 50%.

Dr. Suelette Dreyfuss ástralskur blaðamaður sem stóð að rannsókninni, segir afstöðu Íslendinga áhyggjuefni og bera vott um litla tiltrú þeirra í þessum efnum. Hrunið og afleiðingar þess kynnu mögulega að hafa áhrif á lítið traust ÍSlendinga.

Róbert Marshall þingmaður sem gekk nýlega til liðs við Bjarta framtíð hefur lagt fram frumvarp til laga um miðlun upplýsinga og vernd uppljóstrara.

„Þetta eru mjög afgerandi niðurstöður og sýnir okkur þörfina á því að þetta verði að lögum. Bæði þarf að vekja fólk til umhugsunar um tilgang og eðli uppljóstrarans og tryggja lagalegt umhverfi fyrir hann. Þannig að í raun staðfestir þessi rannsókn það sem mig grunaði, að við þyrftum að taka þennan málaflokk föstum tökum," segir hann.

Róbert segir tilfinnanlega skorta lagalega umgjörð fyrir uppljóstrara sem stíga fram. Frumvarpið sem lagt hefur verið fram eigi að tryggja vernd uppljóstrarans hvort sem hann greinir frá því við sína yfirmenn á vinnustað eða leiti til lögreglu eða fjölmiðla.

„Hvort sem það er í opinbera eða einka geiranum og greina frá misgerðum sem kunna að vera lögbrot eða varða almannahag. Þetta er sjálfsagður hlutur í lýðræðisþjóðfélagi að fólk geti stigið fram og ekki þurft að óttast um stöðu sína eða afleðingar fyrir sjálft sig ef það gerir það. "