Íslendingur í fangelsi í Tyrklandi - "Við fáum ekki að vita neitt“

Tuttugu og átta ára gamall Íslendingur situr nú í fangelsi í Tyrklandi grunaður um að hafa ætla að smygla fornminjum úr landinu. Maðurinn, sem heitir Davíð Örn Bjarnason og er búsettur í Svíþjóð, var í fríi ásamt konu sinni í byrjun mánaðarins.

Á föstudag voru þau á heimleið en á flugvellinum stöðvuðu tollverðir þau í reglubundnu efitliti. Í farangrinum fannst stein sem tollverðir telja fornmun en það liggja viðurlög við að fara með slíkan stein úr landi.

Þóra Björg Birgisdóttir, kona hans segir í samtali við fréttastofu að hann hafi keypt þrjá steina af götusala á ferðamannastað. Þau hafa ekki haft hugmynd um að einn þessara steina væri fornmunur. Leiðsögumenn og ferðaskrifstofan hafi ekkert frætt þau um málið.

Hún óttast um öryggi mannsins síns - hann hafi aðeins fengið að hringja í móður sína úr fangelsinu. Símtalið hafi verið 20 sekúndna langt en í því hafi hann sagt að hann hefði verið barinn og þar skildi hann enginn.

Þóra Björg segir að hann gæti átt yfir höfði sér þriggja til 10 ára fangelsisdóm eða milljóna sektir. Dómari mun kveða upp dóm á morgun.

„Maður fær ekkert að heyra af honum. Hann er með engan pening, ekki með passann sinn - hann er ekki með neitt. Maður veit ekkert hvernig fangelsin eru þarna og hvernig honum líður. Er hann með mörgum í herbergi? Er hann í herbergi? Er búið ræna af honum fötunum? Við fáum ekki að vita neitt og þeir hjá Utanríkisráðuneytinu fá ekki að vita neitt," segir Þóra Björg.

Nánar verður rætt við Þóru í kvöldfréttum Stöðvar 2 í kvöld.