Meginreglan að Reykjavík verði lágreist borg

Bannað verður að byggja ný háhýsi í miðborg Reykjavíkur samkvæmt nýju aðalskipulagi sem kynnt var í borgarráði í morgun. Hús sem verða reist innan Hringbrautar mega ekki vera hærri en fimm hæðir og sérstök hverfisvernd verður sett á svæðið til að vernda einkenni þess.

Ólöf Örvarsdóttir sviðsstjóri umhverfis-  og skipulagssviðs Reykjavíkur segir þessa stefnu marka tímamót.

„Þetta er í fyrsta sinn sem við erum með stefnu um hæðir húsa í aðalskipulagi. Þannig að stefnumótun í aðalskipulagi er lögð til grundvallar við alla deiliskipulagsgerð þannig að þetta hefur áhrif á þá uppbyggingu sem verður. Auðvitað hefur þetta ekki áhrif á eldri ákvarðanir en þetta hefur áhrif á nýjar ákvarðanir. Stefnan í aðalskipulaginu er að Reykjavík sé lágreist borg.“

Háhýsi verða því ekki heldur heimiluð annars staðar í borginni nema að uppfylltum sérstökum skilyrðum. Alltaf verður skoðað hvernig háhýsi myndu samræmast götumynd og hvaða áhrif þau hefðu á ásýnd, útsýni og skuggavarp á svæðinu.

„Þetta er svona meginregla og það var í vinnunni meginregla, og sérstaklega um miðborgina en þó bara meginregla fyrir borgina alla. Það var þó farið í ákveðnar greiningar því á sumum stöðum í borginni fer þetta ágætlega. Við sjáum húsin til dæmis við Suðurlandsbrautina sem eru gjarnan sex til átta hæðir og það á bara ágætlega heima þar, þannig að auðvitað eru einhvers konar undantekningar en þá eru það einhverjar landfræðilegar ástæður eða eitthvað annað í byggðinni sem gefur tilefni til að það sé byggt hærra.“

Helstu atriði nýja aðalskipulagsins verða kynnt fyrir almenningi á fundi í ráðhúsi Reykjavíkur klukkan korter yfir fimm í dag.