Vill menn til Mars innan tuttugu ára

„Við þurfum að gera heiminn spenntan fyrir geimferðum á ný,“ segir bandaríski geimfarinn Buzz Aldrin í pistli sem hann ritaði á vefsíðu CNN í síðustu viku, og segir hann nauðsynlegt að senda mannaða flaug til Mars innan tuttugu ára.

Aldrin, sem er á níræðisaldri, er líklega þekktastur fyrir að hafa stigið fæti á tunglið nokkrum mínútum eftir að Neil Armstrong gerði það fyrstur manna þann 21. júlí 1969.

„Það eru meira en fjórir áratugir síðan ég og Neil Armstrong gengum á tunglinu, en að mínu mati hefur of lítil framþróun átt sér stað í geimferðum síðan þá.“

Aldrin segist alltaf hafa talið Mars vera eðlilegan áfangastað í kjölfar tunglferðanna og nú séu mannaðar ferðir til Mars loksins orðinn raunhæfur möguleiki.

„Þökk sé Curiosity- og Opportunity-jeppunum vitum við nú að plánetan er líkari jörðinni að mörgu leyti en við höfðum gert okkur í hugarlund, og líkindin aukast með hverri mynd sem við sjáum.“

Aldrin segir sjálfstraust Bandaríkjamanna nógu mikið til þess að þeir geti verið leiðandi afl í frekari landvinningum í geimnum. Geimferðir auki lífsgæði jarðarbúa og að tækniframfarir sem verði til við geimrannsóknir nýtist venjulegu fólki dag frá degi.

Hann segist hafa áhyggjur af því að óþarfa púðri verði eytt í annað geimkapphlaup, líkt og það sem Bandaríkin og Sovétmenn áttu í á dögum kalda stríðsins, og að vænlegri kostur sé að kanna geiminn í samstarfi við aðrar þjóðir.

Mikilvægast segir hann þó að Bandaríska geimferðastofnunin (NASA) vinni að því að koma mönnum til Mars sem fyrst, og að milli ársins 2030 og 2040 ættu geimfarar að geta haft varanlega búsetu þar.

Pistilinn í heild sinni má lesa hér.