Sigrar móður sína alltaf í skák

„Hann vinnur mig bara alltaf,“ segir Erla Hlín Hjálmarsdóttir, aðjúnkt við Háskóla Íslands og móðir Óskars Víkings Davíðssonar skáksnillings. Hann og sjö önnur íslensk ungmenni fara til Svartfjallalands komandi helgi að keppa fyrir hönd Íslands á Evrópumóti ungmenna í skák.

Óskar Víkingur er átta ára gamall og hefur stundað skák í tvö ár.

„Það hefur orðið mikill uppgangur í skák á Íslandi og margir grunnskólar eru byrjaðir að kenna íþróttina,“ segir Erla Hlín um vinsældir skákíþróttarinnar.

Síðustu helgi urðu tvær skáksveitir Norðurlandameistarar, annars vegar barnaskólasveit Álfhólsskóla og hins vegar grunnskólasveit Rimaskóla. Evrópumótið um næstu helgi er einstaklingskeppni en slík stórmót eru yfirleitt kynjaskipt.

Ungu skáksnillingarnir leggja mikið á sig fyrir keppni en yfirleitt æfa þeir allt að fimm sinnum í viku hjá hinum ýmsu taflfélögum víðs vegar á landinu.