Fjölskyldan æfir saman

Íþróttakennararnir Bjarney og Maríanna standa á bak við Íþróttaskóla fjölskyldunnar. Þar stunda börn og fullorðnir hreyfingu saman.



Þessi hugmynd kviknaði fyrir tveimur árum þegar vinkona mín, sem var með dóttur sína í íþróttaskóla, minntist á að gaman væri ef foreldrar gætu tekið þátt. Henni fannst hálfleiðinlegt að þurfa að sitja bara og horfa á,“ segir Bjarney Gunnarsdóttir, sem ásamt Maríönnu Þórðardóttur stendur fyrir námskeiði undir nafninu Íþróttaskóli fjölskyldunnar. „Það var síðan í vor sem við ákváðum að koma þessu í gang og við Maríanna höfum verið að útfæra þetta saman,“ segir Bjarney en námskeiðið hefst næsta laugardag.

Bjarney og Maríanna eru báðar íþróttakennarar og hafa mikla reynslu af íþrótta- og tómstundastarfi með börnum, unglingum og fullorðnum. „Ég hef stundum séð um hópefli á fjölskyldumótum og það er afskaplega skemmtilegt þegar allir koma saman, foreldrar, börn, ömmur og afar, og hamast saman,“ segir Bjarney og hefur því fulla trú á að námskeiðið geti orðið mjög skemmtilegt, bæði fyrir börnin og þá fullorðnu. „Markmiðið er að allir fái eitthvað út úr þessu, bæði hreyfingu og skemmtun,“ upplýsir hún en meðal þess sem boðið verður upp á í íþróttaskólanum eru fjölbreyttar æfingar, hópefli, þrautabrautir, leikir, skotboltaleikir og ratleikir.

Námskeiðið er ætlað börnum á aldrinum 6 til 12 ára og foreldrum eða forráðamönnum þeirra og verður haldið í íþróttahúsi Réttarholtsskóla næstu átta laugardaga frá klukkan 12 til 13. Námskeiðið kostar 8.000 krónur fyrir hverja fjölskyldu en Forvarnasjóður Reykjavíkur styrkir verkefnið, auk þess sem knattspyrnufélagið Víkingur útvegar húsnæðið.

Þeir sem vilja skrá sig eða fræðast nánar um Íþróttaskóla fjölskyldunnar er bent á Facebook eða póstfangið ithrottaskolifjolskyldunnar@gmail.com.