Margrét Gnarr fyrsti íslenski atvinnumaðurinn í fitness

Eins og fram kemur á vefnum Fitnessfréttir.is þá hefur yfirstjórn IFBB formlega staðfest að Margrét Edda Gnarr sem nýverið varð heimsmeistari verið samþykkt sem atvinnumaður hjá IFBB alþjóðasambandi líkamsræktarmanna.

Hvað þýðir það fyrir Margréti að vera samþykkt sem atvinnumaður í fitness. Við heyrðum í heimsmeistaranum:

„Með sigri mínum á heimsmeistaramótinu í fitness er ég er fyrsti Íslendingurinn í sögu fitness hér heima sem á möguleika á að fá atvinnuskírteini. Það er gífurlega erfitt að gerast atvinnumaður en til þess þarftu að vinna svokölluð „A mót". Það eru tvö svoleiðis mót á ári og þau eru IFBB Evrópumót og IFBB Heimsmeistaramót."

„Það er gífurlega mikill heiður að vera samþykktur í atvinnumennskuna. Sem atvinnumaður get ég keppt á stærstu fitness mótum í heimi ásamt aðal fitness stjörnum í heiminum. Stjörnur á borði við Nathalia Melo, India Paulino, Nicole Nagrani og Jessica Paxson en þær allar eru mjög vinsælar á stærstu fitness tímaritunum einsog FitnessRX, Oxygen, Muscle and Fitness Hers og fleiri," segir hún.

„Næsti draumur er að komast í þessi blöð og þau mót sem mig dreymir um að keppa á í framtíðinni eru Arnold Classic USA og Mr.Olympia," bætir hún við. 

Ég er varla ennþá að trúa því

„Það að gerast atvinnumaður og vera fyrsti Íslendingurinn til að gerast atvinnumaður hefur mikla þýðingu fyrir mig og ég er varla ennþá að trúa því að þetta sé loksins að gerast en þetta hefur verið minn draumur síðan ég keppti fyrst haustið 2011."

Varkár þegar kemur að verkefnum

„Ég ætla að vera mjög varkár þegar kemur að verkefnum sem mér bjóðast og hvaða mót verða fyrir valinu. En það sem ég hef ákveðið að gera er að byrja að keppa sem atvinnumaður á næsta ári og ég vil byrja á því að keppa í Evrópu," segir Margrét.

Hvað er svo framundan hjá þér? „Eftir þrjár vikur fer ég til Madrid á Arnold CLassic Spain festival og þar mun ég vinna á risa expói eða öllu heldur vörukynningu. Ég mun vinna á Optimum Nutrition básnum en ég var nýlega samþykkt í þeirra teymi. Bikini fitness pro Jessica Paxson er í Team Optimum Nutrition og er það bara geðveikt að fá að vera partur af þessu flotta teymi. Þar mun ég líka fara í myndatökur hjá www.Team-Andro.com og Claus Willemer," segir Margrét.

Fjarþjálfun Margrétar.