Munúðarfull Miley með apa á bakinu

Söngkonan Miley Cyrus fer hamförum þessa dagana, bæði í raunheimum og á Twitter.

Í morgun birti hún nokkrar myndir af sér í ögrandi stellingum og á einni myndinni er hún með lítinn apa á bakinu.

Apinn sá er klæddur í kúrekabúning og tilkynnti Cyrus samhliða myndbirtingunni að hún ætlaði sér að stofna sína eigin síðu á Tumblr til þess að setja inn fleiri myndir af þessu tagi.

Söngkonan hefur verið mikið milli tannanna á fólki undanfarið fyrir djarfa framgöngu á VMA-hátíð MTV-sjónvarpsstöðvarinnar þar sem hún dillaði sér að margra mati um of.

Þá er hún allsnakin (í stígvélum, að vísu) í nýjasta tónlistarmyndbandi sínu, Wrecking Ball, sem hefur verið spilað tæplega 150 milljón sinnum síðan það var frumsýnt fyrir rúmum tveimur vikum. Margir telja hegðun söngkonunnar að undanförnu einfaldlega vera auglýsingabrellu fyrir væntanlega breiðskífu hennar, Bangerz, sem kemur út þann 4. október.