Minna um rottur og mink í Reykjavík

Minna er um mink á höfuðborgarsvæðinu nú en áður að sögn Þráins Sveinssonar, meindýraeyðis hjá Reykjavíkurborg. Þó eru tugir minka drepnir í Reykjavík og nágrenni á ári hverju.

„Þetta er bara partur af náttúrunni, fólk þarf ekkert að vera hissa á því, ekkert frekar en að lóan komi," segir meindýraeyðirinn.

Að sögn Þráins hefur minkurinn enga hættu í för með sér fyrir menn og dýr. „Ekki nema að það sé farið að abbast eitthvað upp á þá, þá bíta þeir og verja sig eins og aðrar skepnur."

Minkar sjást helst meðfram ám og vötnum. „Það er eitthvað um að þeir sjáist við Elliðaár og Elliðavatn og Korpu og þeir koma hérna niður að sjó. Þar sem er fiskur og æti þar er minkurinn. "

Rottuútköllum hefur einnig fækkað og segir Þráinn að það megi að einhverju leyti rekja til forvarnastarfs sem hefur verið unnið á vegum borgarinnar.

„Þá setjum við eitur í brunna fyrir rotturnar og leggjum gildrur fyrir minkana. Það er alltaf eitthvað um rottur en þær koma til dæmis upp ef drenlagnir eru bilaðar hjá fólki. Þó að við séum kannski ekki sjálfir að drepa mikið af rottum þá er mikill fjöldi sem drepst af okkar völdum með eitrinu."

Sjái fólk til minks hringir það á meindýraeyði. „Þá mætum við og leitum hann uppi. Við erum með hunda sem vísa okkur á hvar þeir eru. Við erum síðan með haglaskammbyssu og drepum þá með þeim."

Að sögn Þráins kemur það fyrir að meindýraeyðar þurfi einnig að farga kanínum. Það telst þó til undantekninga þar sem þær eru friðaðar.