„Það er óskiljanlegt í ljósi þeirrar mikilvægu meðferðar sem fram fer á Heilsustofnun Náttúrulækningafélags Íslands að ítrekað sé ráðist að stofnuninni með þeim hætti sem hér hefur verið gert,“ segir bæjarstjórn Hveragerðis í ályktun.

Eins og fram kom í Fréttablaðinu síðastliðinn þriðjudag telur Gunnlaugur K. Jónsson, formaður stjórnar Heilsustofnunar Náttúrulækningafélags Íslands (HNLFÍ), ríkið hafa þverbrotið þjónustusamninga sína við stofnunina.

Bæjarstjórn segist mótmæla harðlega áformum um niðurskurð á framlögum til HNLFÍ í fjárlagafrumvarpi fyrir árið 2014. Þar sé lagt til að HNLFÍ taki ein á sig allan niðurskurð endurhæfingarstofnana þrátt fyrir að fá einungis fimmtung fjárveitinganna. Niðurskurðurinn sé 27,4 milljóni sem sé um 5 prósent af fjárveitingu ársins.

„Þessi tillaga vekur sérstaka athygli þar sem nýr þjónustusamningur var undirritaður í lok árs 2011 og því áttu forsvarsmenn stofnunarinnar ekki von á öðru en að hann yrði efndur. Í þeim samningi var HNLFÍ gert að bæta á sig kostnaði vegna 20 sjúklinga í þungri endurhæfingu. Allt starfsárið 2012 fór í að aðlaga stofnunina að nýjum samningi en kostnaður vegna þessara breytinga nam rúmum 50 milljónum króna,“ segir bæjarstjórnin.

Aðspurð hvaða hagsmuni Hveragerði hafi í málinu svarar Aldís Hafsteinsdóttir bæjarstjóri að ekki síst sé þetta gríðarlegt hagsmunamál fyrir þá fjölmörgu sem þurfi að nýta og hafi notið mikilvægrar þjónustu Heilsustofnun veitir. „Það er með öllu óskiljanlegt að ekki skuli vera ríkur skilningur á þeirri staðreynd í ráðuneytinu,“ segir Aldís.

Bæjarstjórnin segir orðalag í fjárlögum lýsa vanþekkingu á starfsemi HNLFÍ. „Um 100-120 sjúklingar eru á hverjum tíma í þungri eða meðalþungri endurhæfingu á HNLFÍ í einu ódýrasta legurými landsins,“ segir í bæjarstjórnin sem kveður ljóst að verði ekki gerð breyting muni veruleg skerðing verða á þjónustunni með tilheyrandi kostnaði fyrir ríkið þar sem endurhæfing þurfi þá að fara fram í dýrari úrræðum en í þeim sem í boði séu hjá HNLFÍ.