Segir biðlaun sviðsstjóra fullkomlega óeðlileg

„Nú mun ég senda innanríkiráðuneytinu kvörtun yfir því að bæjarstjórinn sinni ekki skyldum sínum og svari ekki kjörnum fulltrúa,“ segir Guðríður Arnardóttir, oddviti Samfylkingarinnar í bæjarstjórn Kópavogs.

Guðríður ítrekað spurt í bæjarráði um árangur af vinnu Guðrúnar Pálsdóttur, fyrrverandi bæjarstjóra, í starfi sviðsstjóra. Á þar síðasta bæjaráðsfundi boðaði hún kæru á hendur Ármanni Kr. Ólafssyni bæjarstjóra ef hann svaraði ekki á næsta bæjarráðsfundi. Sá fundur fór fram í gær. Svar var ekki lagt fram.

Ármann segir starfslýsingu Guðrúnar liggja fyrir. „Þá var starfinu gerð skil í formlegu svari til Guðríðar sem lagt var fram í bæjarráði í febrúar á þessu ári,“ segir bæjarstjórinn sem kveður blaðamann vera að upplýsa hann um að „Guðríður ætli að fylgja eftir hótun sinni“ um kæru. „Það verður vissulega forvitnilegt að sjá „kæruna“ og ekki síður málmeðferð ráðuneytisins.“

Guðríður segir að þó að Ármann vísi til starfslýsingar geti verið grundvallarmunur á því sem eigi að gera og því sem sé gert.

„Ég hef ekki séð að á þessum mánuðum sem liðnir eru frá því staðan var stofnuð að það hafi eitthvað verið í vinnslu sem tengdist þeim verkefnum sem viðkomandi átti að vinna. Áður en staðan var lögð niður óskaði ég ítrekað eftir að starfsmaðurinn mætti fyrir bæjarráð og gerði grein fyrir störfum sínum. Hann mætti ekki,“ segir Guðríður.

Þá vísar Guðríður til þess að sviðstjórinn er á tólf mánaða biðlaunum. „Þetta er ný staða og þessi sami starfsmaður er áður búin að vera á fimmtán mánaða starfslokasamningi. Þetta er fullkomlega óeðlilegt og ég mun óska eftir lögfræðilegu áliti á því hvort það var nauðsynlegt að leysa viðkomandi frá störfum á tólf mánaða starfslokasamningi,“ segir hún.

Ármann segir að misskilnings virðist gæta. Ekki sé um ræða starfslokasamning við Guðrúnu heldur eigi hún rétt á biðlaunum samkvæmt almennum kjarasamningi. Lögfræðingar bæjarins hafi að sjálfsögðu farið yfir það.

„Þá vil ég ítreka að þessi snjóbolti fór af stað þegar Guðríður ákvað að reka þáverandi bæjarstjóra í upphafi árs 2012 án skýringa og enn í dag liggja ekki fyrir trúverðug svör. Svo virðist sem Guðríður sé enn að glíma við þær pólitísku afleiðingar sem það frumhlaup hafði á sínum tíma,“ segir bæjastjórinn.