Leonardo DiCaprio var fyrsti gesturinn

Jón Andrés Jónsson á amerískan húsbíl sem hann leigir út í erlend kvikmyndaverkefni hér á landi. Húsbíllinn hefur hýst fjölmargar Hollywood-stjörnur sem hafa heimsótt landið síðustu ár.

„Þetta er amerískur húsbíll árgerð 2006 og hefur nánast eingöngu verið notaður í kvikmyndaiðnaðinum síðustu sjö árin. Fyrst ætlaði ég að eiga þennan bíl fyrir sjálfan mig en síðan fréttist það að ég ætti hann. Hann varð fljótt eftirsóttur fyrir aðalleikara sem hafa leikið í myndum sem hafa verið teknar hér upp og hefur fengið það hlutverk að hýsa þessa menn á tökustað,“ segir Jón Andrés Jónsson.

Húsbíllinn er vel útbúinn. Hann er með svefnaðstöðu fyrir fjóra, glæsilegar eldhúsgræjur, sturtu, salernisaðstöðu og sjónvarp. Jón fylgir alltaf með í för þegar bíllinn er leigður í kvikmyndaverkefni.

„Bíllinn er ekki leigður öðruvísi en bílstjórinn sé með. Það getur ekki hver sem er keyrt svona bíl. Það er farið á ýmsa staði þar sem ekki venjan að fara með bíl sem þennan. Það geta komið upp erfiðar aðstæður og ef eitthvað kemur upp á þarf ég að vera til staðar.“

Húsbíllinn hefur hýst allar stærstu stjörnurnar sem hafa heimsótt klakann síðustu misseri, þar á meðal Ben Stiller, Tom Cruise, Sean Penn og Vinnie Jones.

„Fyrsti leikarinn sem notaði bílinn var Leonardo DiCaprio. Ég hef ekkert blandað geði við leikarana og kem lítið nálægt þeim. Ég keyri bara bílinn og sé til þess að hann sé heitur, hreinn og fínn. Ég er kominn á eftirlaun og lít á þetta sem áhugamál,“ segir Jón. Hann á fjögur börn og níu barnabörn og segist ekki vera sérstaklega öfundaður í fjölskyldunni yfir því að vera í nærvist stórstjarna.

„Það var gaman að þessu fyrst en svo fer ljóminn af þessu. Þetta er nánast eingöngu bið,“ segir Jón. En getur hann ekki deilt skemmtisögum af fræga fólkinu?

„Þó ég viti sögur þá má ég ekkert segja. Ég skrifa undir þagnareið. En það hefur eitt og annað komið upp.“