Fiðrildafögnuður gegn sýruárásum í Hörpu

Sýruárásir tíðkast um allan heim en eru hvað algengastar í Suður- og Suðaustur-Asíu og í 80 prósentum tilvika eru fórnarlömbin konur eða ungar stúlkur.

Algengt er að konur verði fyrir sýruárásum fyrir að óhlýðnast fjölskyldu sinni, eiga í ástarsamböndum, hafna bónorðum eða sækja um skilnað frá ofbeldisfullum eiginmönnum.

Konur fá sjaldan þá þjónustu sem þær þarfnast, þær eru niðurlægðar og oft gefið í skyn að sökin sé þeirra. Oftast fær gerandi mildan eða engan dóm.

Fyrir utan mikla líkamlega fötlun í kjölfar sýruárása fylgir iðulega félagsleg einangrun og takmarkaðir möguleikar á að taka þátt í samfélaginu á nýjan leik.

„Augu umheimsins hafa beinst að Indlandi undanfarna mánuði þar sem mikil umfjöllun hefur verið um gróf mannréttindabrot á konum, stúlkum og börnum,“ segir Inga Dóra Pétursdóttir framkvæmdastýra UN Women á Íslandi.

„Kynbundið ofbeldi er gríðarlegt vandamál en það er mikilvægt að hafa í huga að öll þessi umfjöllun hefur verið mikil vitundarvakning fyrir íbúa Indlands.

Í kjölfar andláts Jyoti Singh, en hún lést eftir hrottalega hópnauðgun í desember, hafa verið látlaus mótmæli sem hafa leitt til endurskoðunar á lagaramma um kynbundið ofbeldi á Indlandi,“ segir Inga Dóra. 

„Sýruárásir eru ein birtingarmynd kynbundins ofbeldis en slíkar árásir  eru sérlega gróf mannréttindabrot. Þær tíðkast um allan heim en talið er að um 1.500 sýruárásir verði árlega og þar af um 1.000 þeirra á Indlandi. Þrátt fyrir alvarleika málsins hafa sýruárásir ekki hlotið mikla athygli frjálsra félagasamtaka, almennings né ríkisstjórna,“ útskýrir hún jafnframt.

„UN Women á Íslandi vill leggja lóð sín á vogarskálarnar, taka þátt í þeirri miklu vitundarvakningu sem á sér stað á Indlandi og koma af stað Fiðrildaáhrifum héðan frá Íslandi alla leið til Indlands. Við höfum séð áður að samtakamáttur okkar hér heima getur komið af stað flóðbylgju breytinga. Samtökin vonast svo sannarlega til að eitt þúsund manns mæti í Hörpu og geri þennan draum að veruleika.,“ segir Inga Dóra.

Landsþekktar konur hafa lagt átakinu lið, þeirra á meðal Unnur Ösp Stefánsdóttir leikkona sem jafnframt er verndari samtakana, Friðrika Hjördís Geirsdóttir kokkur, Margrét Erla Maack dagskrágerðarkona, Kristbjörg Kjeld leikkona og Elma Stefanía Ágústsdóttir leikkona, svo fáar séu nefndar.

Aðgöngumiði gesta á fögnuðinn er vinaarmband búið til á Indlandi en hugmyndin varð til er nokkrar hugaðar indverskar konur sem lifað hafa af sýruárásir komu saman í Nýju Delí.

Óhætt er að segja að kvöldið verði ævintýralegt en fjölmargt íslenskt listafólk leggur þessu góða málefni lið. Má þar á meðal nefna Sigríði Thorlacius og Högna Egilsson úr Hjaltalín, dansara úr Íslenska dansflokknum, landsþekktar leikkonur sem verða með ógleymanlegan gjörning og aðra óvænta viðburði.

Miðaverð er einungis 3.900 krónur og er hægt að kaupa miða hér, í verslun ELLU á Ingólfsstræti og verslun Kronkron á Vitastíg.

Allur ágóði af kvöldinu rennur til Styrktarsjóðs Sameinuðu þjóðanna til afnáms ofbeldis gegn konum sem er í umsjón UN Women og vinnur að því að uppræta sýruárásir á margvíslegan hátt.