Ljótustu orðin í íslensku máli

„Það er auðvitað mjög huglægt hvað er ljótt orð, margir tengja það við merkingu orðsins. Oft eru orðin ljótari þegar þau lýsa einhverju ljótu,“ segir Viktor Orri Valgarðsson, sem stofnaði Facebook-síðu ásamt Garðari Þór Þorkelssyni þar sem leitað er að ljótasta íslenska orðinu. Þar er hægt að leggja fram tillögu að orði og þau orð sem fá flest læk keppa loks um titilinn.

„Þessi keppni er ágætt dæmi um mátt samfélagsmiðlanna og er afurð þess að við félagarnir vorum að ræða keppnina um fallegasta orðið sem fram fór fyrir stuttu. Okkur þótti enn áhugaverðara að halda keppni um ljótasta orðið,“ útskýrir Viktor Orri.

Síðan var stofnuð fyrir skömmu og hefur á stuttum tíma fengið tæp eitt þúsund læk og hafa hundruð orða verið tilnefnd.

Spurður um einkenni ljótra orða segir Garðar: „Óheppileg samsetning hljóða, eins og tvö L líkt og í orðinu fjall, hljómar ekkert of vel.“

Aðstandendur síðunnar eiga þó í stökustu erfiðleikum með að velja ljótasta orðið sjálfir. „Orð sem erfitt er að segja og skrifa eru mér ofarlega í huga, eins og gengilbeina sem er mjög asnalegt orð, einnig eru orð eins og geirvarta og úlnliður ofarlega í huga,“ bætir Viktor við.

Ljótasta orðið verður valið á degi íslenskrar tungu, þann 16. nóvember. „Við gerum ráð fyrir fjölmennri samkomu,“ bætir Viktor við að lokum en frú Vigdísi Finnbogadóttur verður boðið sem heiðursgesti.