Erlend markaðssetning okkar er á heimsmælikvarða

„Þessi viðurkenning sýnir okkur að erlend markaðssetning okkar er á heimsmælikvarða. Fyrir markaðssetningu á áfangastað erum við í sama flokki og Volkswagen, Audi og Hyundai, sem eyða milljörðum í markaðsherferðir,“ segir Inga Hlín Pálsdóttir, forstöðumaður ferðaþjónustu og skapandi greina hjá Íslandsstofu, um verðlaunin sem markaðsherferðinni Inspired By Iceland voru veitt við hátíðlega athöfn í Brussel á miðvikudaginn.

Herferðin hlaut hin virtu Euro Effie-verðlaun í flokknum afþreying og skemmtun. Verðlaunin voru veitt sérstaklega fyrir heimboð Íslendinga sem voru hluti af herferðinni árið 2011-2012. Er þetta í annað skipti sem Inspired By Iceland eru veitt verðlaunin. Árið 2011 hlaut herferðin aðalverðlaun fyrir notkun samfélagsmiðla og einnig Grand Prix-verðlaun fyrir herferð ársins. Euro Effie eru virtustu og eftirsóttustu fagverðlaunin í auglýsingageiranum. Það eru Samtök evrópskra auglýsingastofa (EACA) sem standa að veitingu verðlaunanna, sem voru fyrst veitt árið 1954.

„Þetta eru ein flottustu og virtustu auglýsingaverðlaun sem hægt er að fá og mikil viðurkenning fyrir alla aðila að herferðinni. Sá hluti herferðarinnar sem verðlaunin eru veitt fyrir gekk út á það að við biðluðum til Íslendinga að bjóða erlendum ferðamönnum heim.

Ferðamenn sóttu um heimboðið á samfélagsmiðlum okkar og það voru um 200-300 Íslendingar sem tóku þátt í þessum með okkur. Sem dæmi má nefna að kona frá Bjarteyjarsandi bauð ferðamönnum að tína kræklinga með sér.

Forseti Íslands bauð í pönnukökur en skemmtilegt er að segja frá því að mæðgur komu til dæmis sérstaklega frá Seattle í Bandaríkjunum til þess að fá sér kaffi með forsetanum.

Jón Gnarr bauð ferðamönnum í sushi upp á Höfða og svona mætti lengi telja,“ segir Inga Hlín.

Spurð út í næstu verkefni Inspired By Iceland segir Inga að alltaf sé unnið með skemmtilegt þema á hverju ári til þess að fá athygli erlendis. „Núna vorum að byrja vetrarherferðina fyrir þetta ár þar sem við biðjum Íslendinga að segja ferðamönnum frá leyndarmálum.

Það þarf ekki að vera um náttúru eða staði, það má vera um hlut, safn, uppskrift, sögu eða annað skemmtilegt sem fólk langar til þess að deila og telur að ferðamaðurinn eigi að fá að upplifa um allt land. Tilgangur herferðarinnar er að vekja athygli á Íslandi yfir vetrartímann og fjölga ferðamönnum á þeim tíma,“ segir Inga Hlín að lokum.