Hannar ekki lengur fyrir villtar partýstelpur

Breski fatahönnuðurinn Matthew Williamson, sem sýndi nýverið vor-og sumarlínu sína á tískuvikunni í London, segist vilja breyta um stefnu í hönnun sinni. Það sást vel á tískuvikunni þegar hann sýndi mun afslappaðri og klassískari flíkur en áður.



Williamson segir að hann stefni nú á að hanna föt fyrir elegant og fágaðar konur, frekar en villt partídýr, eins og hann gerði áður. Í viðtali við breska tískublaðið Grazia segir Williamson, að þar sem hann er að eldast, hafi verið kominn tími á breytingar.

Hann sagði jafnframt að við gerð nýjustu fatalínu sinnar, hafi hann haft konur í huga, ekki ungar stelpur. Í framhaldi af þessum breytingum fékk hann leikkonuna Gwyneth Paltrow til liðs við sig.



„Fyrsta flíkin sem við hönnuðum saman er ólífugræn peysa með lituðum Swarovski kristöllum. Ég er rosalega ánægður með útkomuna, þetta er hin fullkomna haustflík,“ segir Williamson.



Þetta er ekki í fyrsta skipti sem Paltrow fer í samstarf með þekktum fatahönnuðum en hún og vinkona hennar, fatahönnuðurinn Stella McCartney, gerðu fatalínu saman sem er fáanleg á lífstílssíðu Paltrow, Goop.com. Að auki hefur Paltrow starfað með Rag and Bone, Warby Parker og Alexandra Von Furstenberg.



„Ég lít á mig sem konu sem elskar fallega hluti og hef sterkar skoðanir á því hverju ég klæðist. Í samstarfi okkar Williamson, vil ég hafa yfirsýn yfir hönnuninni, frekar en að hanna einstaka flíkur,“ segir Paltrow um samstarfið.