Ég ætla ekki að breyta nafninu mínu

Óskarsverðlaunaleikkonan Kate Winslet og eiginmaður hennar, viðskiptajöfurinn Ned Rocknroll, giftu sig í desember á síðasta ári.

Í viðtali við breska dagblaðið The Telegraph var Winslet spurð hvort hún ætli sér að taka upp eftirnafn eiginmanns síns og svaraði hún því neitandi og sagði jafnramt að það hljómaði frekar einkennilega að heita Kate Rocknroll. „Ég hef verið gift tvisvar áður og aldrei breytt nafninu mínu. Mér finnst nafnið mitt vera mjög fallegt og ég vil halda mínu ættarnafni,“ sagði hún.

Rocknroll var skírður Ned Abel Smith en lét breyta nafninu sínu fyrir nokkrum árum. Winslet og Rocknroll kynnstust í ágúst árið 2011 þegar þau voru í fríi á bresku paradísareyjunni Necker. Winslet gengur með fyrsta barn þeirra hjóna og er komin rúmlega sjö mánuði á leið. Hún kveðst aldrei hafa verið hamingjusamari en nú.

„Mér líður alveg stórkostlega. Ég dái mæður og allt sem þær gera. Það er mikil breyting að verða foreldri og lífið breytist meira en maður gerir sér grein fyrir. Börnin þín eru þér allt og allt annað skiptir minna máli,“ segir Winslet í viðtalinu.

Leikkonan flaug nýverið til Toronto með eiginmanni sínum þar sem hún kynnti nýjustu mynd sína, Labor Day, en hún fjallar um þunglynda, einstæða móður.

Post by Lífið á Visir.is.