Biðu spennt eftir Grand Theft Auto

Forsala á tölvuleiknum Grand Theft Auto 5 hófst á mánudagskvöld í Gamestöðinni í Kringlunni. Biðröðin var löng fyrir utan verslunina og greinilega mikil eftirvænting eftir leiknum. Alls seldust 1.500 eintök í forsölunni.

Grand Theft Auto 5 er dýrasti tölvuleikur allra tíma og er að auki dýrari en flestar Hollywood-myndir sem hafa verið gerðar. Leikurinn kostaði um 265 milljón dala eða 32 milljarða íslenskra króna. Það er eftirtektarvert að nú þegar er búið að ná inn þeim kostnaði með forsölu leiksins úti um allan heim.