Allt í köku-systur ritstýra Disney-bók

„Þetta var æðislegt,“ segir Kristín Eik Gústafsdóttir, stofnandi verslunarinnar og vefsíðunnar Allt í köku.

Kristín Eik og systir hennar, Katrín Ösp, ritstýrðu nýjustu matreiðslubók Disney, Afmælisveislur, og höfðu þær gaman af.

Í bókinni verður meira um skreytingar en uppskriftir. „Hún Svala sem er að vinna hjá Eddu [bókaforlagi] var að skoða hjá okkur í búðinni. Hún fór að leiða hugann að því hvort það væri grundvöllur fyrir því að gefa út skreytingabók og svo leiddi eitt af öðru,“ segir Kristín Eik um ástæðuna fyrir þátttöku þeirra systra í bókinni.

„Það var sérstaklega skemmtilegt að geta unnið með Disney en það eru strangar reglur í kringum það. Þetta eru karakterar sem allir þekkja og allir geta tengt við.“

Verslunin Allt í köku opnaði í nóvember 2010 og hefur stækkað mikið síðan. Í fyrstu voru 300 vörunúmer í boði en núna eru þau orðin 4.000 talsins.